Nest One ҳақида тарқатилган миш-миш рад этилди

Алоқабанк ва Nest One лойиҳаси раҳбари Мурод Назаров 22 феврал куни ижтимоий тармоқларда пайдо бўлган хабарни рад этди.

Интернетдаги миш-мишда Тошкент ситидаги Nest One мажмуасидан турар ва нотурар жойларни сотиб олган харидорлар ўз мулкларини тасарруф эта олмаётгани, бунга гўёки иншоот қурилишини молиялаштирган Алоқабанкка кредит шартномасига мувофиқ пуллар тўланмай келинаётгани, банк судга мурожаат қилгани иддао қилинган.

Nest One қурилишида Алоқабанк иштирок этмаган

Алоқабанк ахборот хизматининг маълум қилишича, банк томонидан бу бино қурилиши учун ҳеч кимга кредит маблағлари берилмаган.

“Nest One биносининг қурилишига Алоқабанкнинг ҳеч қандай алоқаси йўқ. Шундай экан, банк томонидан бу бино учун ҳеч кимга кредит маблағлари берилмаган ва ўз навбатида бирор тадбиркорга нисбатан судга мурожаат қилинмаган. Хабарда келтирилган Алоқабанк билан боғлиқ барча гаплар ёлғон”, – дейилади расмий муносабатда.

“Nest One билан боғлиқ бирорта кредитимиз йўқ”

Тадбиркор Мурод Назаровнинг Kun.uz'га изоҳ беришича, Nest One қурилиши билан боғлиқ қарздорлик йўқ ва бинонинг кадастри ҳам чиқиб бўлган.

“Бу ёлғон хабар. Мен ҳам хайрон бўлдим, бизда кредитлар йўқ эди-ку, деб. Бинонинг кадастрлари 100 фоиз чиққан, 554 та харидорга бу расмийлаштириб ҳам берилди. Қолган мижозлар билан ишлар олиб бориляпти. Нафақат Nest One, балки Murod Buildings, NRG’да ҳам бирорта кредит йўқ. Бу фейк хабарларни тарқатганлар қонун олдида жавоб беришади”, – дейди тадбиркор.