Салоҳ «ёрилди»: муаммо нимада?

«Ливерпул» ҳужумчиси Муҳаммад Салоҳ кетма-кет уч ўйинда захирада қолиб кетганидан кейин норози кайфиятда шов-шувли интервю берди. «Ливерпул» учун кўп меҳнат қилгани, лекин клуб уни «автобус тагига ташлаётгани» ҳақида гапирди. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

«Мени муаммо сифатида кўрсатишмоқчи»

АПЛ 15-турида «Ливерпул» «Лидс» меҳмони бўлди. Арне Слот жамоаси иккинчи бўлим бошида Уго Экитике урган икки гол эвазига бир қарашда осон ғалабага эришаётганди, лекин 73 дақиқадан «отишма» бошланиб, «Ливерпул» назоратни бой берди — 3:3. Ўйиндан кейин кўпчилик нега Муҳаммад Салоҳ майдонга тушмагани билан қизиқди, чунки ҳужумчи саломат захирада ўтирганди. Клуб афсонаси шу куни кетма-кет учинчи ўйинда захирада қолиб кетди, Слот уни бир дақиқа ҳам майдонга туширмади. Ва ўйиндан кейин микс-зонада Салоҳ «ёрилди».

«Бўлаётган ишларни қабул қила олмайман. Клуб учун кўп нарса қилдим. Тўғри, ўзимни бошқалардан катта деб ҳисобламайман, лекин ўз позициямда ўйнаш учун доим курашишга мажбур эмасман, бу учун етарлича иш қилиб қўйганман.

Кимдир мени ҳаммасига айбдордек кўрсатмоқчи, мени муаммо дейишмоқчи. Мураббий билан муносабатимиз яхши эди, лекин энди ҳеч қандай муносабат йўқ. Нега бундай бўлаётганини билмайман, кимдир мени клубда кўрмоқчи эмас.

Клуб ёзда кўп ваъдалар берганди, лекин кўриб турибсизки учта ўйиндан буён захирадаман. Шунчаки ваъдангизни бажаринг, демоқчиман. Мен «Ливерпул»ни доим яхши кўрганман, болаларим ҳам клубни яхши кўради. Клуб учун кўп иш қилдим, Премиер-лигага келганимдан кейин ҳаммадан кўп гол урдим, ўзимни муаммо деб ҳисобламайман.

Бошқалар билан бунақа бўлса, уни қўллаган бўлишарди, лекин мен билан бундай эмас. Масалан, Ҳари Кейн ўнта ўйинда гол уролмаганида ҳам медиада «Ҳарри албатта гол уради», деб чиқишганди. Менга келганда ҳамма «Муҳаммад захирада ўтириши керак» демоқда. Ҳарри, мени кечир. Ота-онамга «Брайтон» билан ўйинга келинглар, дедим. Мен «Энфилд»да мухлислар билан хайрлашиб Африка кубогига кетмоқчиман, кейин нима бўлишини билмайман», деди футболчи.

Муаммо нимада?

Аслида муаммо «Ливерпул»нинг натижаларида, менимча. Ўтган йил Слот асосан Клоппдан қолган жамоа билан АПЛни ютди, Европанинг энг стабил жамоаларидан бирига айланди, Муҳаммад Салоҳ эса жуда зўр мавсум ўтказиб лиганинг энг яхши футболчиси бўлди. Янги мавсум олдидан «Ливерпул» жуда зўр трансферлар қилди: Вирц, Экитике, Исаак каби жуда қимматбаҳо футболчиларни сотиб олди. Кўпчилик бу «Ливерпул» АПЛ ва Чемпионлар Лигасини ютиш учун асосий даъвогар дея бошлади. Лекин Слот жамоаси мавсумни ёмон ўтказмоқда: АПЛда ўнинчи ўрин, янги ўйинчилар деярли ўзини кўрсата олмаяпти, қўшимчасига Салоҳ билан боғлиқ муаммо.

Муҳаммад Салоҳ бунгача мураббийларга муаммо туғдирадиган хулқ-атвори билан танилмаган. Тўғри, Салоҳ ва Мане ўртасида келишмовчилик бор эди, сенегаллик футболчи клубдан кетишига катта эҳтимол шу ҳам сабаб бўлган. Лекин Юрген Клопп бу низони клуб ичида ҳал қилиб юборганди. Бу гал барчаси бошқача.

Афторитет ўйини

Салоҳнинг демаршидан кейин англиялик собиқ футболчилар уни танқид қилди, футболчи клуб ичидаги муаммони кўчага олиб чиқиши керак эмас, дейишди. Хусусан, «Ливерпул» сафида «Олтин тўп»ни ютган охирги футболчи Майкл Оуэн ҳам шу маънода фикр билдирди.

Клуб ичидагилар ҳам Салоҳни очиқчасига қўллаб чиққани йўқ. Ван Дейк Салоҳни қўллашини айтди, лекин барча муаммо клубда, натижаларда эканини ҳам қўшимча қилди, мураббийни танқид қилмади.

Салоҳ асосий таркибдаги ўрни учун курашишга мажбур эмаслигини айтгани кўпчиликни ҳайрон қолдирди. Чунки замонавий футболда ҳеч кимга асосий таркибда жой кафолатланмаган.

Мураббий Салоҳ билан шу масалада келишмай қолган бўлиши мумкин. Айтайлик, Слотт қайсидир ўйинга Салоҳни иккинчи бўлимда туширмоқчи бўлган-у, ҳужумчи асосий таркибда тушишни талаб қилгандир. Бу борада Слотни ҳам тушуниш мумкин: Салоҳ АПЛдаги энг зич тақвим вақтида Африка кубогига кетади, клуб ўнтача ўйинни усиз ўтказади. Табиийки мураббий Салоҳ йўқлигида қандай ўйнашни синаб кўришни истайди.

Салоҳ клуб ёзда берган ваъдаларини бажариши керак, деди, лекин шартномада ҳеч бир клуб ҳеч бир футболчига асосий таркибдаги ўрнини кафолатламаса керак, шунчаки ўйинлар, натижаларга қараб бонус ҳисобланиши мумкин.

Бир қарашда Салоҳ ўзини клубдан ҳам катта тутаётгандек кўриниши мумкин, лекин бу гаплар қачон айтилганини унутмаслик керак. Футболчи кетма-кет учта ўйинда захирада қолиб кетган, жамоаси охирги дақиқада гол ўтказиб ғалабани бой берган вақтда жуда асабий бўлади, бунақа қизиган вақтда айтган гап билан хулоса қилиб бўлмайди.

Мен Муҳаммад Салоҳни ҳам, Арне Слотни ҳам катта профессионал деб биламан. Ҳозир клубдаги вазият қандай экани 13 декабрдаги «Брайтон» билан ўйинда билинади. Салоҳ шу ўйиндан кейин Африка кубогига кетади. Ўзининг айтишича, қитъа чемпионатидан кейин клубдан кетиши ҳам мумкин. Лекин менимча, «Ливерпул» вазиятни ўнглаб, ҳаммасини жойига тушира олади, бу катта клуб. Муҳаммад Салоҳ атрофидаги вазият изга тушиб, у яна Ливерпул сафида голлар ура бошлашини жуда истайман. Чунки бутун мусулмон оламидаги энг катта атлет Саудия чемпионатида эмас, дунёдаги энг зўр лигада энг зўр футболчилар билан рақобатлашиб юришга муносиб.

Ўткир Жалолхонов тайёрлади
Тасвирчи ва монтаж устаси — Фахриддин Ҳотамов