Самара областида тўпланган ўзбекистонликлар учун лагер-обсерватор ташкиллаштирилди

Бу ҳақда област маъмурияти хабарида маълум қилинди.

“Област маъмурияти ушбу фуқароларнинг ўзини изоляциялаши масаласини ҳал қилиш ва коронавирус тарқалиши олдини олиш мақсадида воқеа жойида лагер-обсерватор ташкиллаштиришига тўғри келди”, дейилган хабарда.

Област маъмуриятида таъкидланишича, Ўзбекистон фуқаролари чегаралар очилгани ҳақидаги нотўғри маълумотларга таяниб чегараолди ҳудудига келганлар.

Чегарада тўпланган ўзбекистонликлар Қозоғистон орқали ўтиш учун йўлак ташкиллаштирилишини илтимос қилишмоқда. Айни вақтда бу масала бўйича бирор қарор қабул қилинмаган. Ўзбекистон ташқи ишлар вазирлиги оператив штаби Россия-Қозоғистон чегарасидаги мавжуд вазият тўғрисида маълумотни ҳар томонлама кўриб чиқиш учун Республика махсус комиссиясига юборган.

Аввалроқ Ўзбекистон фуқаролари Россиянинг турли минтақаларидан автотранспорт воситаларида чегарага келишаётгани ва Ўзбекистонга қайтиш учун Қозоғистон ҳудуди орқали йўлак яратилишини талаб қилишаётгани маълум қилинганди. Бироқ Россия ички ишлар вазирлиги ходимлари уларни карантин киритилган Оренбург области Первомайск районига қўйишмаяпти ва улар Самара областининг Большечерниговка районида қолишмоқда.