Сербияда полиция ва намойишчилар ўртасида тўқнашувлар давом этмоқда

Сербиянинг бир неча шаҳарларида шанба куни кечқурун мамлакат президенти Александр Вучичнинг истеъфосини талаб қилувчи намойишчилар билан полициячилар ўртасидаги тўқнашувлар давом этди. Валево шаҳрида бир гуруҳ намойишчилар ҳукмрон Сербия тараққийпарвар партияси офисига ўт қўйди, полиция кўздан ёш оқизувчи газ қўллаган, намойишчилар мушакбозлик билан жавоб қайтарган.

Сербиянинг бир неча шаҳарларида, жумладан, пойтахт Белград ва мамлакатнинг иккинчи йирик шаҳри Нови Садда тўқнашувлар бўлиб ўтди.

Сербия полицияси маълум қилишича, якшанбага ўтар кечаси полиция маҳкамаларига 56 киши олиб келинган, шундан 16 нафари ҳибсга олинган. Олти нафар полициячи енгил тан жароҳати олган.

Талабалар ташкилотлари бошчилигидаги серб мухолифати тўққиз ойдан бери норозилик намойишлари ўтказиб келмоқда. Бундай акциялар ўтган йил 1 ноябридан Нови Сад вокзалида темир-бетон соябон қулаб тушиб, 16 киши ҳалок бўлиши ортидан бошланган.

Намойишчилар ушбу фожиада айбдорларни жазолашни, коррупцияга қарши курашни кучайтиришни, шунингдек, навбатдан ташқари сайловлар эълон қилишни талаб қилмоқда.

Ҳозирча улар бош вазирнинг истеъфосига эришди, бироқ президент Вучич истеъфога чиқмоқчи эмас.

Якунланаётган ҳафта давомида намойишчиларнинг ҳокимият билан қарама-қаршилиги кескинлашди: Сербия шаҳарлари кўчаларида полиция билан тўқнашувлар кетма-кет беш кундан бери давом этмоқда. Чоршанба куни 27 полициячи ва маҳаллий аҳоли вакилларидан 80 га яқини яраланган, 47 киши қўлга олинган.

Полиция шафқатсизлиги бўйича айбловлар

Энди намойишчиларнинг норозилиги куч тузилмаларининг шафқатсиз ҳаракатлари билан боғлиқ айбловларга ҳам сабаб бўлмоқда. Маълум қилинишича, 14 августда Валевода ўтказилган норозилик намойишида полиция 25 ёшли маҳаллий фуқарони аёвсиз калтаклаган. Шунингдек, Сербиянинг Beta ахборот агентлиги хабар беришича, талабалар намойиши вақтида 15 ва 17 ёшли болалар ҳибсга олинган ва калтакланган.

Ижтимоий тармоқларда полициячилар намойишчиларни таёқ билан ураётгани акс этган бир неча видеоёзувлар эълон қилинди.

Полиция эса ҳаддан ташқари шафқатсиз ҳаракат қилганини рад этиб, намойишчиларни ҳужумларда айбламоқда.

Сербия расмийларига кўра, шанба куни кечқурун Белграддан тахминан 100 км жануби-ғарбда жойлашган Валево шаҳридаги намойишга 4 мингга яқин одам тўпланган.

Ниқоб таққан намойишчилар гуруҳи ҳукмрон Сербия тараққийпарвар партияси офисига ўт қўйган, кейинроқ бу одамлар полициячиларга петарда ва тош отишни бошлган. Полиция кўздан ёш оқизувчи газ ва шовқинли гранаталар билан жавоб берган. Ёнғин тезда ўчирилди.

«Хайриятки, [Сербия тараққийпарвар партияси идораси] ичида ҳеч ким йўқ эди. Бу одамлар яшайдиган турар жой ва офис биноси эканини ҳисобга олсак, ёнғин уларнинг ҳаётини хавф остига қўйиши мумкин эди», – дея Сербия ички ишлар вазири Ивица Дачичнинг сўзларини келтиради ТАСС агентлиги.

Белградда полиция ҳукмрон партиянинг марказий идорасига бормоқчи бўлган намойишчиларни тўхтатди, шундан сўнг тўқнашувлар бошланди. Нови Садда ҳам тўқнашувлар бўлгани айтилмоқда.