Трамп Эрон нефтини ўзлаштиришни хоҳлашини яширмади

АҚШ президенти Financial Times учун берган интервюсида Эрондаги «нефтни қўлга киритмоқчи»лиги ва Эрон нефти экспорт қилинадиган Харк ороли эгаллаб олиниши мумкинлигини айтди.

Трамп Венесуэлада бўлгани каби нефтни тўлиқ ва чексиз назорат қилиш имкониятига эга бўлишни хоҳламоқда.

«Тўғрисини айтсам, менга энг кўп ёққани Эрондаги нефтни олиб қўйиш ғояси, аммо АҚШдаги айримлар нега бундай қилаётганимни сўрайди, чунки улар аҳмоқ», – дейди Америка президенти.

Бундай режа Эрон нефти экспорти маркази ҳисобланган Харк оролини эгаллаб олишни талаб этади.

«Балки Харк оролини ишғол қилармиз, балки йўқ. Бизда кўплаб вариантлар мавжуд. [Ишғол қилсак], бу у ерда бироз вақт қолишимизни ҳам англатади», – дейди у.

Трампнинг фикрича, оролда қандайдир мудофаа борлиги даргумон ва шунинг учун АҚШ у ерни осонлик билан эгаллаб олиши мумкин.

Шу билан бирга, Америка президенти покистонлик «эмиссарлар» орқали ўтказилаётган музокараларда олдинга силжиш борлигини айтган.

У қисқа вақтичида ўт очишни тўхтатиш бўйича келишувга эришиш мумкинлиги ҳақида гапирган.

«Бизда 3 мингга яқин нишон қолди. Биз 13 минг нишонни бомбаладик ва яна бир неча мингини йўқ қилиш қолган. Жуда тез фурсатда келишувга эришишимиз мумкин», – дейди Трамп. Аввалроқ у Эронга ултиматум муддатини 6 апрелга қадар узайтирганди – агар Теҳрон шу муддат ичида Ҳўрмуз бўғозини очмайдиган ва ўт очишни тўхтатиш шартларига розилик бермайдиган бўлса, Эрон энергетика объектлари зарба остида қолиши мумкин.