Петербург губернатори Хайрулло Ибодуллаевни кўкрак нишони билан мукофотлади

Россиянинг Санкт-Петербург шаҳри губернатори Александр Беглов Петроград районидаги уйнинг еттинчи қаватидан тушиб кетган болани қутқариб қолган ўзбекистонлик Хайрулло Ибодуллаевни тақдирлади. Бу ҳақда шаҳар маъмурияти матбуот хизмати хабар қилди.

Губернатор Ибодуллаевга болани қутқариш чоғида кўрсатган жасорат ва фидойилиги учун «Қутқаришдаги жасорат учун» кўкрак нишонини топширган. Унга эсдалик соати ҳам совға қилинган.

«Бу ишингиз учун миннатдорчилик билдираман – бу чинакам мардоналик. Сиз ўзингиз ҳақингизда ўйламадингиз. Ўзингиз жароҳат олдингиз, аммо етти ёшли боланинг ҳаётини сақлаб қолдингиз. Бутун шаҳримиз сизга катта раҳмат айтади. Бундай эзгулик ҳеч қачон унутилмайди. Оилангиз сиз билан фахрланиши мумкин», – деган губернатор маросимда.

Беглов Ибодуллаев билан учрашуви ҳақида ўзининг телеграм-каналида ҳам пост қолдирган.

«Қаҳрамонлар турлича бўлади. Баъзан улар қутқарувчилар формасида, шифокорлар халатида, баъзан – ишчилар махсус кийимида. Бугун Хайрулло Ибодуллаев билан учрашдим. Унинг жасорати ҳақида бутун шаҳар билади. У иш вақтида ўз ҳаётини хавф остига қўйиб, деразадан қулаган 7 ёшли болани ушлаб қолган. Ўзи жароҳат олди, аммо болани қўйиб юбормади. Хайрулло клининг компаниясида ишлайди, ўзи – тўрт фарзанднинг отаси. Унга бефарқ бўлмагани, ёрдамга тайёрлиги ва инсонийлиги учун „Қутқаришдаги жасорат учун“ кўкрак нишонини топширдим», – деб ёзди у.

Каналда тақдирлаш маросимидан олинган суратлар эълон қилинган.

Эслатиб ўтамиз, 22 феврал куни Россиядаги телеграм-каналларда пастда турган ишчи еттинчи қаватдан тушиб кетган болани тутиб қолгани акс этган видеолар кенг тарқалганди. Бу вақтда боланинг онаси бошқа хонада бўлган, деразаларга эса махсус ҳимоя мосламалари ўрнатилмаган.

Кейинроқ болани қутқариб қолган шахс ўзбекистонлик Хайрулло Ибодуллаев экани маълум бўлди.

23 феврал куни Ўзбекистон президенти Шавкат Мирзиёев уни «Жасорат» медали билан тақдирлади. Шунингдек, у россиялик пропагандачи Тигран Кеосаян номидаги бир миллион рубллик мукофотга сазовор бўлган.

Миграция агентлиги эса унга ўзига қулай пайтда Ўзбекистонга парвоз қилиш учун сертификат совға қилган.

Россия Давлат думаси депутати Николай Новичков Хайрулло Ибодуллаевнинг қаҳрамонлиги мукофот ва ҳурматга лойиқлигини билдириб, агар истаса унга Россия фуқаролигини соддалаштирилган тартибда бериш кераклигини айтгани хабар қилинган.