“Халқлар дўстлиги” метро бекатининг иккинчи чиқиш жойи бир ойдан кўпроқ муддатга ёпилади

Пойтахт метрополитен хизматининг хабар беришича, метрополитен фаолиятини такомиллаштириш ва хизмат кўрсатиш сифатини ошириш мақсадида ерости метро бекатларида ўрнатилган эскалаторларнинг ўз хизмат муддатини ўтаб бўлганларини босқичма-босқич равишда янгиларига алмаштириш режалаштирилган. 

Режавий ишларнинг биринчи босқичида “Халқлар дўстлиги” метро бекатидаги эскалаторларни замонавий турдагисига алмаштириш ишлари олиб борилади. 

Шу муносабат билан 10 феврал санасидан бошлаб 20 март санасига қадар “Халқлар дўстлиги” метро бекатининг иккинчи вестибюли, “Tashkent city” мажмуасига олиб чиқувчи томон ёпилади. 

“Шунингдек, йўловчилар учун бекатнинг биринчи вестибюли, “Халқлар дўстлиги” саройига олиб чиқувчи томон одатий режимда иш фаолиятини олиб боради”, – дейилади расмий изоҳда. 

Метрополитен хизмати келтирилган ноқулайликлар юзасидан йўловчилардан узр сўраган. 

Маълумот учун, пойтахт метросининг ерости бекатларидан 5 тасига, “Миллий боғ”, “Ғафур Ғулом”, “Ўзбекистон”, “Юнус Ражабий” ва “Машинасозлар”га фақат битта томонидан кириб-чиқиш мумкин. Бешала ҳолатда ҳам иккинчи вестибюл шу бекатлар фойдаланишга топширилган вақтдан буён ёпиқ. 

Ҳозирда Тошкент метрополитени қошида очилган “Тошметротранс” МЧЖ лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилган. Экспертиза хулосаси олинганидан кейин, босқичма-босқич таъмирлаш ишлари олиб борилиб, барча ёпиқ вестибюллар 2024 йилнинг май ойигача очиб қўйилиши ваъда қилинганди. 

Эслатиб ўтамиз, 2023 йил 15 декабр куни Тошкент ерусти метросининг Қурувчилар даҳасидан Сергелигача бўлган “Турон” ва “Қипчоқ” метро бекатларининг қурилиши якунланиб, синов тариқасида поездларнинг йўловчиларсиз ҳаракати бошланганди. Аммо ҳозирча бу синовлар қачон тугаши маълум эмас.