Президент исломий банклар тўғрисидаги қонунни имзолади

Ўзбекистонда исломий банк фаолиятини ташкил этишнинг ҳуқуқий асослари яратилди. Тегишли қонун 27 март куни президент томонидан имзоланди. Қонунда исломий банк лицензияси учун талаблар, бу лицензия эгаларининг ҳуқуқ ва мажбуриятлари, исломий молия операцияларининг турлари ва бу операцияларни солиққа тортишнинг ўзига хос хусусиятлари белгиланган. Қонун 3 ойдан кейин кучга киради.

Фото: Президент матбуот хизмати

Президент Шавкат Мирзиёев 27 март куни Ўзбекистонда исломий банк фаолиятини жорий қилишга қаратилган қонунни имзолади.

Қонун – “Ўзбекистон Республикасининг айрим қонун ҳужжатларига Ўзбекистонда исломий банк фаолиятини жорий қилишга қаратилган қўшимча ва ўзгартиришлар киритиш тўғрисида” деб номланади.

Қонун асосида Солиқ ва Фуқаролик кодекслари ҳамда 7 та қонунга ўзгартириш ва қўшимчалар киритилди. Хусусан:

қонунчиликка исломий банк фаолияти, исломий молия операциялари, исломий молия стандартлари ҳамда инвестициявий омонат (депозит) тушунчалари киритилди;
исломий банк фаолиятини амалга ошириш ҳуқуқини берувчи лицензия жорий қилиниб, мазкур лицензияни олиш бўйича аниқ талаблар ўрнатилди;
исломий банк фаолиятини амалга ошириш ҳуқуқини берувчи лицензияга эга банклар томонидан амалга ошириладиган исломий молия операциялари рўйхати тасдиқланди;
исломий банк фаолиятини амалга оширувчи банкларга бевосита савдо фаолиятини амалга оширишга ҳамда юридик шахсларни ташкил этиш ва юридик шахсларнинг устав фондларидаги улушларни ёки акцияларни чекловларсиз олишга рухсат берилди;
исломий молия фаолияти билан боғлиқ масалаларни мувофиқлаштириш мақсадида Марказий банк ва банкларда исломий молия кенгашини ташкил этиш ҳамда унинг фаолиятига доир талаблар белгиланди.

Қонунда исломий молия операцияларига солиқ солишнинг ўзига хос хусусиятлари ҳам белгиланган.

Қонун расмий эълон қилинган кундан эътиборан 3 ойдан сўнг кучга киради.

Аввалроқ Ўзбекистонда 2030 йилгача иккита исломий банк очилиши маълум қилинган эди. Жорий йилда эса камида битта тижорат банкида исломий “дарча” фаолиятини йўлга қўйиш кўзда тутилган.