Ўзбекистонда валюта операцияларини амалга ошириш қоидаларига ўзгаришлар киритилди

Юридик шахслар валюта сотиб олиш учун берган буюртмасида техник хатолик бўлса, уни тузатишга имкон берилади. Барча валюта айирбошлаш операциялари, шу жумладан онлайн операциялар ҳам ягона тизимда ҳисобга олинади. Чет эл фуқароларига бир-бирига пул ўтказиш ва бир қатор валюта операцияларини амалга оширишга рухсат берилди. Капитал бозори иштирокчиларига ҳам айрим енгилликлар бор.

Фото: Kun.uz

Ўзбекистон Марказий банки қарори билан, валюта операцияларини амалга ошириш қоидаларига ўзгартиш ва қўшимчалар киритилди.

Қарорга кўра, юридик шахслар томонидан чет эл валютасини сотиб олиш учун берилган буюртмада хатоликлар аниқланган тақдирда, мижоз томонидан буюртмага техник тузатиш киритилиши мумкин.

“Амалиётда кўп учрайдиган муаммолардан бири – юридик шахслар томонидан валюта сотиб олиш учун берилган буюртмаларда кичик техник ёки имловий хатолар сабабли операцияларнинг рад этилиши эди. Қарор билан, энди кичик хатолар бўлса, уларни тузатиш имконияти берилади. Бу – тадбиркорлар учун вақт тежайди”, – дейилади регулятор изоҳида.

Банк кассаларидан нақд чет эл валютасини бериш тартиби ҳам аниқ белгилаб қўйилмоқда. Унга кўра:

Жисмоний шахслар ўз ҳисобварағидаги маблағлари доирасида валютани чекловсиз олиши мумкин.
Юридик шахслар учун эса нақд валюта аниқ белгиланган мақсадлар асосида берилади.

Белгиланишича, барча валюта айирбошлаш операциялари, жумладан онлайн операциялар ягона тизимда ҳисобга олинади. Марказий банкнинг қайд этишича, бу – бозордаги жараёнларни кузатиш ва тушунишни осонлаштиради.

Қарорда жисмоний шахслар учун қуйидаги қулайликлар кўзда тутилган:

энди қайси давлат фуқароси бўлишидан қатъи назар барча жисмоний шахслар банк ҳисобварақлари орқали бир-бирига шахсий мақсадларда (носавдо) пул ўтказиши мумкин;
бундан буён хорижлик жисмоний шахслар ҳам мамлакат ичида устав фондига маблағ қўшиш, хайрия қилиш ёки мерос билан боғлиқ ички валюта операцияларини амалга ошира олади.

Шунингдек, капитал бозори иштирокчилари қуйидаги енгилликлардан баҳраманд бўлади:

юридик шахслар чет эл валютасида чиқарилган қимматли қоғозлар бўйича тўловларни амалга ошириш учун валюта сотиб олишда ортиқча ҳужжатлар талаб этилмайди – бунда асос сифатида қимматли қоғоз чиқарилганини тасдиқловчи ҳужжатнинг ўзи етарли бўлади;
хорижий инвесторлар фонд бозорида қимматли қоғозларни сотишдан тушган маблағларини ўз мурожаати асосида эркин равишда чет элга олиб чиқиши мумкин бўлади.

Марказий банк қарори 2026 йил 30 март куни қабул қилиниб, 22 апрелда Адлия вазирлиги томонидан давлат рўйхатидан ўтказилган. Қарор расмий эълон қилинган кундан эътиборан кучга кирди.