Тошкент метросининг ерости бекатларидаги ёпиқ вестибюллар очилади

Тошкент метрополитенининг ерости бекатларидан 5 тасига бекатнинг фақат битта томонидан кириб-чиқиш мумкин. Бешала ҳолатда ҳам иккинчи вестибюл шу бекатлар фойдаланишга топширилган вақтдан буён ёпиқ қоляпти.

“Ғафур Ғулом” бекати / Фото: Тошкент метрополитени

Булар – “Миллий боғ”, “Ғафур Ғулом”, “Ўзбекистон”, “Юнус Ражабий” ва “Машинасозлар” бекатларидир.

Улардаги иккинчи кириш-чиқиш жойлари бетонлар ва панжаралар билан тўсиб қўйилган.

“Тошкент метрополитени”нинг Kun.uz'га маълум қилишича бу бекатлардаги иккинчи вестибюллар улар қуриб фойдаланишга топширилганидан буён ёпиқ ҳолатда қолмоқда. Бунга йўловчилар оқимининг жуда камлиги сабаб бўлган.

“Миллий боғ” бекати / Фото: Тошкент метрополитени

“Юнус Ражабий” бекати / Фото: Тошкент метрополитени

Маълум бўлишича, ҳозирги кунда Тошкент метрополитени қошида очилган “Тошметротранс” МЧЖ лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилган.

Экспертиза хулосаси олинганидан кейин, босқичма-босқич таъмирлаш ишлари олиб борилиб, барча ёпиқ вестибюллар 2024 йилнинг май ойигача очиб қўйилади.

“Ўзбекистон” бекати / Фото: Тошкент метрополитени

Маълумот учун, Тошкент метросининг қурилиши 1971-1972 йилларда бошланган. 1977 йилда биринчи – “Чилонзор” йўналиш ишга туширилган. Бир томонлама кириш-чиқиш йўлагига эга “Миллий боғ” метро бекати шу линияда жойлашган.

1984 йилда метрода навбатдаги – “Ўзбекистон” йўналиши очилган. Бу йўналишдаги “Ғафур Ғулом”, “Ўзбекистон” ва “Машинасозлар” бекатлари ҳам бир томонлама кириш-чиқиш йўлаги билан фойдаланишга топширилган.

2001 йил октябр ойида “Юнусобод” йўналишининг биринчи участкаси, узунлиги 7,5 километр бўлган олтита станция фойдаланишга топширилган. Бир вестибюлли “Юнус Ражабий” метро бекати ана шу “Юнусобод” йўналишида жойлашган.

Муаллиф: Дилшода Шомирзаева

#Тошкент #метро