Наманганда 60-бор ўтадиган гуллар фестивали учун 20 миллион ниҳол парваришланмоқда

Дунё бўйича кактусларнинг 7 минг тури аниқланган. Наманганда гулчилик билан шуғулланадиган Мўминовлар оиласи эса 1200 хил кактусларни парваришламоқда. Умрибоқий кактуслардан мингга яқини эса гул очади.

Наманганлик гулчилар авлодининг давомчиларидан бири Баҳромжон Мўминовнинг айтишича, баъзи бир кактуслар йилда бир марта гулласа, айримлари 4-5 марта ва ҳатто 10 мартагача гул очар экан. Асосан уруғидан кўпайтириладиган бу тиканли гулларни шохлатиш ва пайвандлаш орқали ҳам кўпайтириш мумкин.

— Биз гулчилар авлодиданмиз, отам ҳам гуллар парвариши билан шуғулланганлар. Биз ҳам ёшлигимиздан шунга меҳр қўйиб улғайганмиз. Коллекциямизда катта ёшли гуллар кўп, улардан энг каттаси 61 ёшга тўлди, 25-30 ёшга тўлганлари ҳам бор.

Плантациямизда кактуслардан ташқари 300 турдан ортиқ гулларни парвариш қиляпмиз. Вилоятимизда ҳар йили ўтказиладиган анъанавий гул байрамида 1981 йилдан буён қатнашамиз, кўплаб фахрли ўринларни қўлга киритганмиз. Энг юқори натижа 1983 йилда бўлган, унда биринчи ўринни эгаллаганмиз ва вилоят ҳокимлиги томонидан автомобил совға қилинган эди.

Бу йилги юбилейга ҳам катта тайёргарлик кўряпмиз, 80 фоиз гулларимизни тайёрлаб бўлдик. Насиб бўлса, 3-4 минг гул олиб чиқишни режалаштиряпмиз, — дейди гулчи Баҳромжон Мўминов.

Наманганда анъанавий маросим тусини олган Гул байрами жорий йилда 60-марта ўтказилади. Наманган гулчилар ассоциацияси ҳар йили ушбу байрамга алоҳида ҳозирлик кўради. Гулчилар ассоциацияси раиси Отабек Жўраевнинг айтишича, бу йилги мавсумда Наманган шаҳри кўчаларига 10 миллион дона гул кўчати экиш режалаштирилган.

— Гулларни етиштириш учун алоҳида қунт ва меҳнат керак. Ҳар бир гул ўзига хос характерга эга, — дейди гулчи Ҳулкар Муҳиддинова. — Масалан, цикломенлар жуда инжиқ гул ҳисобланади, намгарчиликни яхши кўради, қуруқ ва иссиқ ҳавони ёқтирмайди. Ландшафтларга экиладиган гуллар ҳам ўзига хос парваришга эга, аввал кичик қутичаларга уруғлик сепиб чиқилади, кунда бир ўғитлаб, суғориб чиқилади, кўчатлар тайёр бўлгач, алоҳида кичик идишларга ажратиб олинади. 

Ҳозирда плантацияга 52 нафар уста-гулчи бирлашган бўлиб, унда 500 дан ортиқ ишчилар меҳнат қиляпти. Айни пайтда улар 16 гектарлик иссиқхонада 20 миллион дона гул кўчати парвариши билан банд. Гулчилар томонидан етиштирилаётган ушбу чаманлар янгиланиш фаслида шаҳарнинг кўча-ю хиёбонларига тўшалади. Ортган гуллар эса қўшни вилоят ва республикаларга экспорт қилинади.

Ҳозирги кунда Наманган шаҳар ободонлаштириш бошқармаси томонидан гул экиладиган майдонлар, йўл бўйларида агротехник ишлов тадбирлари олиб борилмоқда.

Юлдуз Юлдашева, Kun.uz мухбири