Ҳокимнинг бир вақтнинг ўзида маҳаллий ижроия ва вакиллик органига раҳбарлик қилиш ваколати бекор қилинади

“Маҳаллий вакиллик органлари тўғрисида”ги қонун лойиҳаси эълон қилинди.

“Маҳаллий вакиллик органлари тўғрисида”ги қонун лойиҳаси 7 та боб ва 58 та моддадан иборат бўлиб, унда Маҳаллий вакиллик органи фаолиятининг иқтисодий асоси, унинг структураси ва улар фаолиятининг ташкилий асослари, халқ депутатлари Кенгашлари ваколатлари, халқ депутатлари кенгаши фаолиятида қонунийлик кафолатлари, Кенгаш назоратини амалга оширишга оид қоидалар акс эттирилган. 

Жумладан, ҳокимларнинг бир вақтнинг ўзида маҳаллий ижроия ва вакиллик органига раҳбарлик қилиш ваколати бекор қилиниб, фақат ижроия органи раҳбари бўлишига оид қоидалар белгиланмоқда.

Халқ депутатлари Кенгашлари раиси ва унинг ўринбосарини сайлаш тартиблари белгиланмоқда, жумладан:

• раисликка номзодлар халқ депутатлари Кенгашига сайловда энг кўп депутатлик ўринларини олган сиёсий партиядан бўлмаган ҳар бир сиёсий партия депутатлари орасидан биттадан тақдим этилиши;
• раиснинг ўринбосарига номзодлар халқ депутатлари Кенгашида депутатлик ўринларини олган барча сиёсий партиянинг аъзолари бўлган депутатлари орасидан тақдим этилиши;
• раис ва унинг ўринбосарини сайлаш яширин овоз бериш ва депутатлари умумий сонининг ярмидан кўп овозини олиш орқали сайланиши;
• биринчи овоз беришда номзодлар сайланмаган тақдирда, такрорий овоз бериш тартиби белгиланмоқда.

Халқ депутатлари Кенгаши раиси ва унинг ўринбосарини ўз лавозимидан муддатидан олдин озод этишнинг аниқ асослари қайд этилмоқда, яъни:

• ўзларининг ихтиёрий аризасига кўра;
• одоб-ахлоқ қоидалари мунтазам равишда, яъни 1 йилда 2 мартадан ортиқ бузилганда;
• маҳаллий вакиллик органлари фаолиятининг очиқлигига қўйилган талаблар бузилганда;
• раис ва унинг ўринбосарини муддатидан олдин лавозимидан озод этиш масаласи депутатлар умумий сонининг камида 1/5 қисмидан иборат депутатлар гуруҳининг таклифига асосан кўриб чиқилиши;
• раис ва унинг ўринбосари ўз лавозимидан депутатлар умумий миқдорининг 2/3 қисми яширин овоз бергандан озод этилиши мумкинлиги таклиф этилмоқда.