Россиядаги туғуруқхонада йил бошидан бери 9 чақалоқ вафот этди

Россиянинг Новокузнецк шаҳридаги 1-сон клиник шифохонасининг акушерлик стационарида йил бошидан бери тўққиз нафар чақалоқ вафот этди. Meduza шов-шувли ҳодиса тафсилотларини келтирди.

Кемерово вилояти Соғлиқни сақлаш вазирлигининг маълум қилишича, 2025 йил 1 декабрдан 2026 йил 11 январгача клиникада 234 та туғруқ қабул қилинган. Стационар реанимация бўлимида 32 нафар чақалоқ даволанган. Туғилган чақалоқларнинг 17 нафари ўта оғир аҳволда бўлиб, улардан 16 нафари муддатига етмай туғилган, шу жумладан, тана вазни ўта паст бўлган. 17 нафар чақалоқнинг барчасида ҳомила ичи инфекцияси оғир кечган. Барча чақалоқларга клиник тавсияларга мувофиқ тиббий ёрдам кўрсатилди, дейилади хабарда.

«Афсуски, 9 нафар бола тирик қолмади. Тўрт нафар бола интенсив терапия бўлимида назоратда қолмоқда. Тўрт нафар бола профессор Малаховский номидаги Кузбасс болалар клиник шифохонасига даволаниш учун ўтказилди», дейилади ССВ хабарида.

Туғруқхона бир неча кун олдин беморларни қабул қилишни тўхтатган, бунга болалар ўлими ёки кадрлар етишмаслиги сабаб бўлиши мумкин. Клиника сайтида айтилишича, нафас йўллари инфекциялари билан касалланиш чегарасидан ошиб кетгани сабабли акушерлик стационари «карантин тадбирлари ўтказилаётган вақтда» беморлар қабули тўхтатилган.

Кемерово вилояти бўйича Тергов қўмитаси икки модда - «Касбий вазифаларини лозим даражада бажармаслик» ва «эҳтиётсизлик оқибатида одам ўлдириш» бўйича жиноий иш қўзғатди. Бош шифокори Виталий Херасков лавозимидан четлатилди. Муассасада Кузбасс прокуратураси, «Росздравнадзор» ва «Роспотребнадзор» текширув ўтказмоқда.

Вафот этган чақалоқлардан бирининг отаси туғруқхона ходимлари болаларнинг аҳволи ҳақидаги маълумотларни ота-оналардан яширганини айтди. Унинг сўзларига кўра, туғруқдан сўнг эрталаб тиббиёт ходимлари у билан боғланиб, чақалоқ ва рафиқасининг аҳволи яхши эканини, туғруқ муваффақиятли ўтганини айтган. Шу куни кечқурун у боланинг ўлимидан хабар топди. Эркакнинг айтишича, шифохона ходимлари унинг ўлим сабаби ҳақидаги саволларига жавоб беришдан бош тортган.

Вафот этган чақалоқлардан бирининг онаси, 26 ёшли Арина Б. туғруқхонанинг барча ходимлари касал бўлганини, улар йўталиб, аксирганини, аммо шифохонада ниқобсиз ва қўлқопсиз юрганини айтди. Унинг сўзларига кўра, эрта туғилган чақалоғининг қон босими кўтарилган, у реанимацияга юборилган ва у ерда вафот этган. Шифокорнинг айтишича, бунга юрак тўхташи сабаб бўлган, бироқ кейинчалик Аринанинг таъкидлашича, мурдани ёриб кўриш инфекция борлигини кўрсатган.

Виталий Херасковнинг айтишича, шифохонада янги туғилган чақалоқларнинг ўлимига сабаб бўлиши мумкин бўлган вирусли инфекция аниқланмаган. Унинг сўзларига кўра, ҳар бир ўлим алоҳида кўриб чиқилмоқда. «Улар [болалар] ҳақиқатан ҳам барчаси мураккаб, чала туғилган, ҳар бири ўзига хос касалликларга эга. Энг муҳими - ҳозир хавф йўқ. Ҳомиладорлар учун ҳам, умуман шаҳарликлар учун ҳам», деди бош шифокор. Херасков чақалоқлар ўлимида шифокорларнинг айбини «қатъиян рад этишини» айтди.

Туғруқхонада содир бўлган воқеага Федерация Кенгаши спикери Валентина Матвиенко изоҳ берди. Унинг сўзларига кўра, Новокузнецкда чақалоқлар ўлими туғилишни қўллаб-қувватлаш учун барча саъй-ҳаракатларни амалга ошираётган давлат учун «фожиага айланди». У Кенгашнинг махсус қўмитасига терговнинг боришини кузатиб туришни топширди. Россия соғлиқни сақлаш вазири Михаил Мурашко Новокузнецкка туғруқхона ишини текширадиган мутахассисларни юборди. Гуруҳга В.И.Кулаков номидаги акушерлик, гинекология ва перинатология миллий тиббий тадқиқот маркази (ММИМ) ва «Росздравнадзор» раҳбари Алла Самойлова бошчилигидаги Санкт-Петербург педиатрия университети мутахассислари киритилган.

Новокузнетскдаги туғруқхонада кўплаб шикоятлар бўлди, деди Федерация Кенгашининг ижтимоий сиёсат қўмитаси раҳбари Елена Перминова. Унинг сўзларига кўра, юзага келган вазият уни ҳайратда қолдирган: «Мен ҳозир ижтимоий тармоқлар ва Новокузнецкка оид хабарларни кўриб чиқдим, у ерда туғаётган аёлларнинг ушбу туғруқхона ходимларига ва умуман ушбу туғруқхонанинг ҳолатига нисбатан жуда кўп эътирозлари бор эди». Шифохонадаги беморлар антисанитария шароитларидан шикоят қилган, сувараклар ва каламушлар бўлгани, беморларга ифлос идишларда ачиган бўтқалар ва пашша тушган чой берилгани, деворларда эса моғор борлигини айтган.