Соловёв Бонядан узр сўради

Телебошловчи Владимир Соловёв блогер Виктория Боняни жонли эфирда ҳақоратлагани учун узр сўради.

Instagram юлдузи бўлган Виктория Боня (унинг 14 миллионга яқин обуначиси бор) ва пропагандачи Владимир Соловёв ўртасидаги можаро блогер 14 апрел куни ўз аккаунтида «халқ номидан» Путинга видеомурожаат эълон қилиши ортидан бошланганди. У «губернаторлардан ҳеч бири айтмайдиган» бешта муаммони санаб, одамлар Путиндан қўрқиши, ўзи эса қўрқмаслиги ҳақида гапирганди. Кремлдагилар Боня айтган масалалар бўйича «иш олиб борилаётгани»ни маълум қилган. Унинг ўзи кейинроқ кўзига ёш олиб, Кремлдагилар унинг мурожаатига эътибор қаратгани учун Путин ва Песковга миннатдорчилик билдирганди.

Бонянинг мурожаати кенг муҳокама қилина бошлагач, Владимир Соловёв ўзининг кечки шоуси эфирида уни «ифлос оғзини очиб, ҳаммаёқни ифлослантирмаслиги керак бўлган» «сийқаси чиққан фоҳиша» деб атаганди. Давлат думаси депутати Виталий Милонов ҳам унга қўшилиб, Боняни «саводсиз блогер» ва «эскорт» деб атаганди. Ижтимоий тармоқ фойдаланувчилари ҳақоратли сўзлар учун Соловёвни кескин танқид қилган, блогернинг ўзи эса сунъий интеллект орқали ясалган роликни эълон қилганди – унда Боня Ўргимчак одам қиёфасида Соловёв, Милонов ва Артемий Лебедевга қарши курашаётгани акс этади. У пропагандачиларни судга беришини айтганди.

Амалда эса Боня 28 апрел куни Соловёв эфирида меҳмон бўлди.

Узр сўраш ва Путиннинг ёнини олиш

Эфир Боня оёғидаги оғриқдан шикоят қилиши билан бошланди, у буни стресс билан изоҳлаган. «Буни менинг айбим деб ҳисоблаймиз», – деган Владимир Соловёв.

Кейин эса Боня жамоатчилик эътибори унинг Путинга мурожаатига эмас, Соловёв билан можаросига бурилиб кетганини қайд этган:

Мен ўз ҳис-туйғуларим ва одамларнинг менга ёзганлари ҳақида Путинга мурожаат ёздим. Муҳими, улар ўз муаммолари унутилмаганини тушуниши керак. Менда ҳеч қандай сценарий бўлмаган, ҳеч ким менга пул тўламаган. Мени ҳақорат қилганингиз учун узр сўрашингизни истардим. Сиз [Италия бош вазири Жоржиа] Мелонидан ҳам узр сўрашингиз керак.

Телебошловчи эса ундан айтган сўзлари (Украина президенти Володимир Зеленский томонидан «юборилган жосус» ва «сийқаси чиққан фоҳиша») учун узр сўраган. Соловёвнинг айтишича, унинг бу қадар ҳиссиётга берилишига Боня ўз мурожаатида муаммоларни кўтаргани эмас, балки унинг кириш сўзлари сабаб бўлган – Instagram юлдузи мурожаатини қуйидаги ибора билан бошлаганди: «Владимир Владимирович, сиздан қўрқишади. Халқ сиздан қўрқади, блогерлар, артистлар қўрқади, губернаторлар сиздан қўрқишади».

Сизнинг мурожаатингизни юқоридагиларга етиб борганида, Путиндан қўрқишлари ҳақидаги сўзлардан жаҳлим чиқди. Чунки Россияда Путиндан қўрқишмайди, балки севишади. Унинг фронтга келиши аскарлар учун ҳам байрам бўлади. Сиздан фойдаланишди, буни асосий мақсади Россияда демократия йўқлигини, Путин эса диктатор эканлигини кўрсатиш бўлган Ғарбдаги нашрлар илиб кетишди...

Албатта, узр сўрашим керак. Мен ҳаддан ташқари ҳиссиётга берилиб кетдим ва ўз сўзларимга жиддийроқ муносабатда бўлишим керак эди.

Боня Соловёвга узр сўрагани учун миннатдорчилик билдирган ва Путинга мурожаатида тилга олинган мавзулар муҳокамасига қайтишга уринган.

Хусусан, у ҳозирда инстаграмдаги обуначиларини Туапсадаги экологик фалокат кўпроқ ташвишга солаётганини айтган. Соловёв эса бу бошқа турдаги муаммо эканини айтиб, овозини баландлатган ҳолда уруш ҳақида гапиришга ўтган ҳамда у яшайдиган Монакода уруш йўқлигини қайд этган.

Блогер ташқи сиёсатни муҳокама қилмаслигини таъкидлаган, аммо Соловёв унинг сўзини бўлиб, бақирганча дронлар Россияга ҳужум қилаётган, Екатеринбургдаги турар жойларга келиб урилаётган экан, бу ташқи сиёсат ҳисобланмаслигини айтган.

Соловёв эфир давомида бир неча бор Боняга қандайдир платформа (масалан, Max мессенжери ёки «Соловёв Live» шоусида) очишни таклиф қилиб, у ерда ўз жамоаси обуначилардан келадиган мурожаатлар билан ишлаши мумкинлигини билдирган.

Мизогиния (аёллардан нафратланиш) ва Мелони

«Сиз билан боғлана олганимдан миннатдорман», – дея жавоб берган унга Боня. У аёллар учун эркаклар уларни тинглаётганини англаш муҳимлиги ҳақида гапира бошлаганида, Соловёв яна унинг сўзини бўлиб қўйган. Мулоқот мавзуси яна мизогинияга бурилган (телебошловчи эфир бошидаёқ уни мизогин деб аташ тўғри бўлмаслиги, чунки унинг эфирига келувчи меҳмонларнинг кўпчилиги аёллар бўлиши, шунингдек, аёллардан нафратланувчиларнинг 70 фоизи аслида аёлларнинг ўзи экани ҳақида гапирганди).

Телебошловчи Боняга ўзининг эфирларини кузатиб бормаслиги учун танбеҳ берган, у эса буни Соловёв мунтазам равишда сўкиниши билан изоҳлаган.

«Ватанимни севаман – ватаним билан яшайман», – деган Соловёв.

Кейин Боня телебошловчидан Италия бош вазири Жоржиа Мелонидан ҳам узр сўрашни сўраган – Соловёв уни «puta» (италянчадан таржимаси «фоҳиша»), «ўз сайловчиларига хиёнат қилган фашист махлуқи» ва «инсоният учун иснод» деб ҳақоратлаганди. Блогернинг ўзи ундан мамлакатдаги барча аёллар номидан узр сўрашни бошлаганида Соловёв унинг гапини бўлиб қўйган.

«Мелони? Йўқ, йўқ. Сиз у ҳақда аёл сифатида фикр юритасиз, лекин у бош вазир. Мен уни аёл сифатида ҳақорат қилмадим, бу сиёсий атама. Агар Мелони аёл сифатида хафа бўлган бўлса, мен узр сўрайман. Италиялик сиёсатчилар Путинни «қонхўр жаллод» ва «террорчи» деб аташганди – Путиндан ким кечирим сўрайди? Италян фашистлари етказиб бераётган пуллар эвазига чегара ҳудудларимизда ўлдирилаётган одамларимиздан-чи?» – дея бақирган телебошловчи.

Боня вазиятни она ва ўсмир муносабатига таққослаган. Томонлар Мелони, тенг ҳуқуқлилик ва аёлларга нисбатан нафрат масаласида бир тўхтамга кела олишмаган.

Бонянинг таъкидлашича, улар «ижобий нотада» хайрлашишган.

Мулоқотдан кейин

«Вика – баракалла, ақлли қиз», – деган Соловёв блогер эфирни тарк этганидан кейин.

Бонянинг ўзи эса эфирдан кейин кўп ўтмай ўз инстаграмида янги видео жойлаштириб, унда «аёллар – юмшоқ куч» экани ҳақида гапирган ва Соловёв у ва унинг аудиториясининг эътирозларини инобатга олишга ваъда берганини айтган.

«Бугунги кун менга юмшоқ куч ишлаётганини яна бир бор кўрсатди», – деган у.

Боня Соловёв узр сўрагани туфайли энди уни судга бермаслигини қўшимча қилган.

У шунингдек Соловёв «Италия бош вазиридан ҳам узр сўрагани»ни айтган. «Майли қинғир-қийшиқ бўлса ҳам, узр сўради, мен буни ҳам катта ютуқ деб ҳисоблайман», – деган Боня.

«Мен буни кичик бўлса-да, ғалаба деб биламан. <...> Мен бу уруш билан эмас, ғарибона бўлса ҳам тинчлик билан якунланиши керак деб ҳисоблайман», – дея қўшимча қилган у.