Ижтимоий тармоқларда Самарқанд ва Жиззах вилоятининг бир қатор туманларида сел келгани тасвирланган видеолар тарқалди. Қишлоқлардан бирида сел “Жигули” машинасини оқизиб кетди.
Кеча ва бугун ёғган кучли ёмғирлар Самарқанд ҳамда Жиззах вилоятининг бир қатор туманларида кучли селлар оқишига сабаб бўлган.
Жумладан, Самарқанд шаҳридаги бир қатор кўчаларни сув босган. Иштихон туманидаги бир нечта маҳалла тўлиб сел оққан. Ургут туманидаги сойларга сел келган.
Самарқанд вилояти Фавқулодда вазиятлар бошқармасининг хабар беришича, Иштихон туманидаги маҳалладан оққан сел ҳеч кимга зарар келтирмаган.
Шунингдек, Булунғур ва Ғаллаорол туманларида оққан сел М-39 Алмати-Тошкент-Термиз халқаро автомобил йўлининг сув босишига сабаб бўлган.
Бундан ташқари, бугун, 20 апрел куни ёғган кучли ёмғирлар Жиззах вилоятининг Фориш, Ғаллаорол, Бахмал туманларида сел келишига сабаб бўлган. Фориш туманида бир нечта қишлоқни сел босиб, сувлар хонадонларгача кириб боргани айтилмоқда.
Ҳатто шу туман ҳудудларидан бирида қишлоқ оралаб оқаётган сел “Жигули” машинасини оқизиб кетган.
