4 майдан бошлаб Тошкентда миграция ва фуқароликни расмийлаштириш фаолияти тикланади

4 май, душанбадан бошлаб Тошкент шаҳар ИИББ Миграция ва фуқароликни расмийлаштириш бошқармаси ҳамда унинг туман бўлинмалари фуқаролар қабулини давом эттиради.

Идора хабарига кўра, пойтахтдаги «паспорт столлар» душанбадан шанбагача, соат 9:00 дан 18:00 га қадар фаолият олиб боради. Тушлик вақти – 13:00дан 14:00гача.

«Қабул санитария-эпидемиология меъёрларига қатъий амал қилинган ҳолда олиб борилади. Фуқаролардан тиббий ниқоб тақишни ва ижтимоий масофани сақлашни сўраб қоламиз», – дея қайд этилган билдиришда.

Эслатиб ўтамиз, кеча, 2 май куни Тошкентда коронавирусга чалинган бирорта ҳам янги бемор аниқланмаган эди.

30 апрелдан бошлаб соат 07:00дан 10:00гача ва 17:00дан 20:00гача бўлган вақт оралиғида фуқароларга шахсий автотранспортидан фойдаланишга рухсат берилган. Кейинроқ маълум бўлишича, таксичиларнинг йўловчи ташиши ҳозирча ман этилган.