So‘nggi bir kunda Toshkent va Buxoroda yangi zararlanish holatlari qayd etilmadi, eng yuqori o‘sish Samarqandda

Sog‘liqni saqlash vazirligi O‘zbekistonda koronavirus infeksiyasiga chalinganlar, undan tuzalganlar haqidagi statistik ma'lumotlarni e'lon qildi.

Infografikaga ko‘ra, bemorlarning 639 nafari Toshkent shahrida (Toshkent viloyati) qayd etilgan. Shundan 409 nafari, ya'ni 64 foizi kasallikdan tuzalgan. 5 nafar bemor infeksiya oqibatida vafot etgan.

Zararlanish holatlari soni ko‘pligi bo‘yicha ikkinchi hudud Buxoro bo‘lib, bu yerda jami 428ta holat tasdiqlangan, hozirgacha 325 bemorga javob berilgan - tuzalish ko‘rsatkichi 76 foiz.

Andijon, Qoraqalpog‘iston Respublikasi va Xorazmda ham tuzalish ko‘rsatkichi 60 foizdan yuqori. 

Ayni vaqtda Navoiyda atigi bir bemor davolanmoqda, bu viloyat zararlanish holatlari eng kam qayd etilgan uch hududdan biridir - 2 bemor (ularning biri sog‘aygan). Bir necha kun avval koronavirusdan xoli hududga aylangan Jizzax va Qashqadaryo viloyatlarida mos ravishda 3 va 6 nafardan bemor qayd etilgandi.

Sirdaryo, Samarqand, Namangan va Farg‘ona viloyatlarida koronavirusdan tuzalganlar soni ko‘p emas. Ko‘rsatkich mos ravishda 20, 21, 40 va 48 foizni tashkil qilmoqda.

So‘nggi 24 soat ichida respublikada jami 32ta yangi holat qayd etildi. Shundan 12 bemor Samarqandda aniqlangan. Andijonda 5, Namanganda 5, Xorazmda 5, Farg‘onada 4 va Sirdaryoda 1 kishida koronavirusdan zararlanish tashxisi qo‘yilgan.

Ayni vaqtda, 2 may davomida Namangan viloyatida 17 nafar, Qoraqalpog‘istonda 8 nafar, Xorazm viloyatida 3 nafar, Andijon viloyatida 2 nafar, Toshkent shahrida 29 nafar — jami 59 nafar bemor koronavirusdan sog‘ayib, reabilitatsiyaga kuzatildi.

Qayd etish kerakki, bemorlar tuzalishi sezilarli darajada oshayotgan Toshkent va Buxoroda (shu jumladan, Surxondaryo va Qoraqalpog‘istonda ham) so‘nggi bir kunda birorta ham yangi zararlanish holati qayd etilmadi.