Тошкентда 31 ёшли эркак хусусий клиникада бурун операцияси вақтида вафот этди

Олмазор туманидаги хусусий клиникада 31 ёшли эркак бурун операцияси вақтида вафот этди. Бу ҳақда “Миллар” дастурида хабар берилди.

Маълум қилинишича, эркак жорий йил 12 ноябр куни бурнини операция қилдириш учун хусусий клиникага борган. Марҳумнинг яқинларига кўра, у нафас олишга қийналгани учун бурнини операция қилдирмоқчи бўлган.

“Қорақамишда бир клиника бор экан, деди. Ўша куни келиним, мен ва ўғлим бирга кетдик. Соат 11:30 да олиб кириб кетишди. Жуда унақа ваҳимали операция эмас, дейишди. Негадир юрагим сиқилди. Соат 14:00 дан ошяпти ҳамки, жим-жит. Олиб киришган вақти жони узилган экан. Биз соат 15:30 ларда билдик. Ўз оёғи билан бориб шу аҳволга тушиб ўтирибди болам”, деган марҳумнинг онаси.

“Мен аҳамият берганимда “операционний” кийим умуман йўқ. Қора футболка ва эски шалварида ётибди. Ёрдамчи аппаратини ҳам кўрмадим. Юзлари, қонлари артилмаган. Бир оиланинг бошлиғи кетди. Иккита норасида гўдак қолди. Биласизларми, дунёда энг оғир нарса нима, боласининг тобутини кўтариш. Мен буни душманимга ҳам раво кўрмайман”, деган марҳумнинг отаси кўзда ёш билан.

Эркак операциядан олдин анализ топширган ва шифокорлар жарроҳлик амалиётига рухсат беришган. Дастлабки маълумотларга кўра, беморнинг ўлимига анафилактик шок сабаб бўлган, юрак номаълум сабабга кўра тўхтаб қолган. Марҳумнинг яқинларига кўра эса унга наркозни кўп бериб юборишган. Улар ушбу клиника фаолиятини давом эттираётганидан, воқеадан сўнг шу пайтгача ҳамдардлик ҳам билдирмаганидан норози эканини айтган.

Айни пайтда Олмазор тумани прокуратураси томонидан тергов ишлари олиб борилаётгани билдирилган.

Ҳолат юзасидан бош прокурор матбуот котиби Ҳаёт Шамсутдинов муносабат билдирди. Унга кўра, 2025 йил 29 ноябр куни хусусий клиника шифокорларига нисбатан Жиноят кодексининг 116-моддаси (касб юзасидан ўз вазифаларини лозим даражада бажармаслик) билан жиноят иши қўзғатилган. Шунингдек, Олмазор тумани санитария-эпидемиологик осойишталик ва жамоат саломатлиги хизмати бўлимининг тегишли қарорига асосан хусусий клиника фаолияти расман тўхтатилган.

Қўшимча қилинишича, тергов ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади.