Ўзбекистон Осиё тараққиёт банкидан 1 млрд доллар сўради

Осиё тараққиёт банки Ўзбекистонга коронавирус пандемияси билан курашиш ва унинг иқтисодий оқибатларини камайтиришга ёрдам кўрсатади.

Инвестиция ва ташқи савдо вазирлиги матбуот хизмати хабар қилишича, Ўзбекистон ҳукумати коронавирус пандемияси туфайли бюджетни қўллаб-қувватлаш учун Осиё тараққиёт банкидан 1 миллиард долларгача маблағ ажратишни сўради.

1 апрель куни Ўзбекистон бош вазири ўринбосари — Инвестициялар ва ташқи савдо вазири Сардор Умурзоқов видеоконференция форматида Осиё тараққиёт банки президенти Масацугу Асакава билан Ўзбекистонда коронавирус тарқалишидан аҳолини ҳимоялаш ва глобал пандемиянинг мамлакатдаги ижтимоий-иқтисодий жараёнларига таъсирини юмшатиш бўйича олиб борилаётган ишлар ҳамда мазкур масалаларда ОТБнинг Ўзбекистонга кўрсата оладиган ёрдами механизмларини муҳокама қилди.

Вазирлик хабарига кўра, суҳбат чоғида ОТБ президенти ушбу ўта оғир пайтда Ўзбекистонни Covid-19’га қарши курашишга маблағ жалб қилиш, тадбиркорларни қўллаб-қувватлаш ва иқтисодиётнинг барқарор ишлашини таъминлаш орқали ҳар томонлама қўллаб-қувватлашга тайёрлигини таъкидлади.

У ОТБ Ўзбекистоннинг вирус тарқалиши билан боғлиқ тиббий эҳтиёжлари учун 200 минг АҚШ долларига тенг миқдорида грант ажратилишини маъқуллаган.

«Банк томонидан, Республика соғлиқни сақлаш тизимини ҳар томонлама қўллаб-қувватлашга йўналтирилган қўшимча маблағларни жалб қилиш истиқболлари кўриб чиқилмоқда.

Бундан ташқари, яқин кунларда банк раҳбарияти томонидан ва пандемияда шароитида Ўзбекистон иқтисодиёти ривожланишини рағбатлантириш ва барқарорлигини таъминлаш учун қўшимча молиявий ресурсларни ажратиш масаласини кўриб чиқилади.

ОТБнинг Ўзбекистонга 1 миллиард АҚШ долларигача бюджет маблағларини ажратиш тўғрисидаги аризасини кўриб чиқиш масаласи алоҳида муҳокама қилинди. М.Асакава ушбу масалани ҳал қилиш учун банкда алоҳида гуруҳ тузгани ва ушбу масалани маъқуллаш ва молиявий ёрдам маблағларини ажратиш жараёнларини тезлаштириш учун барча саъй-ҳаракатлар амалга оширилишини маълум қилди», дейилади хабарда.