Тошкентда “Ўзтўқимачиликсаноат” уюшмаси корхоналари Коворкинг маркази ва шоу-руми ишга тушади

Тез орада Тошкент шаҳрида “Ўзтўқимачиликсаноат” уюшмаси корхоналарининг Коворкинг маркази ва шоу-руми ўз фаолиятини бошлайди. Kun.uz мухбири уюшма раиси Илҳом Ҳайдаровнинг 25 апрелда бўлиб ўтган форуми доирасида шу ҳақида хабар берди.

“Ўзтўқимачиликсаноат” уюшмаси раисининг таъкидлашича, бугун мамлакатда сифатли тўқимачилик ва тикув-трикотаж маҳсулотларининг кенг ассортименти ишлаб чиқарилишини йўлга қўйиш ҳамда маҳаллий корхоналарнинг экспорт салоҳиятини оширишга йўналтирилган комплекс чоралар амалга оширилмоқда. Хусусан, Илҳом Ҳайдаров Ўзбекистон тўқимачилик маҳсулотларининг асосий истеъмолчиси Россия экани ва соҳа у ерда экспорт улушини ошириш учун катта салоҳиятга эгалигини қайд этди. 

“Шу билан бирга, бугунги кунда республикада икки текстиль машинасозлик корхонаси фаолият юритмоқда, пойтахтда “Ўзтўқимачиликсаноат” уюшмаси корхоналарининг шоу-руми ва Коворкинг маркази қурилиши кетмоқда. Хорижий мамлакатларда тўқимачилик ваколатхоналари очилди, “Миллий Тўқимачилик комплекси” ахборот-логистик маркази бунёд этилмоқда, Ўзбек-Корея технопаркини эксплуатацияга киритишга доир ишлар тугалланмоқда. Бундан ташқари, Тошкент шаҳрида Kyung-inWomen’sUniversity Халқаро Корея университети филиали очилишига тайёргарлик кўрилмоқда”, - деди тўқимачилик саноати раҳбари.

Коворкинг маркази ва шоу-рум фаолиятини йўлга қўйишдан асосий мақсад маҳаллий ишлаб чиқарувчилар маҳсулотларини намойиш қилиш ва брендлар тарғиботидир. Ушбу Коворкинг марказ ишлаб чиқарувчилар ҳамда харидорлар учун бизнес-платформа вазифасини ўтайди. Соҳанинг пойтахтда идораси бўлмаган корхоналари коворкинг марказ хизматларидан фойдаланишлари, маҳсулот намуналарини беминнат асосда намойиш қилишлари мумкин.

Шу билан бирга, Коворкинг маркази хорижий компаниялар билан алоқа ўрнатишга ва мамлакатдан ташқарида маҳаллий маҳсулотларни тарғиб қилишга кўмак беради. Марказ чет эллик экспертларни жалб қилган ҳолда турли анжуманлар, ўқув семинарлари, тренинглар ташкил қилади.

Таъкидлаш жоизки, форум давомида Ўзбекистон тўқимачилик саноатининг экспорт салоҳияти тузилмаси ҳақида батафсил маълумот тақдим этилди. Унга кўра, 2018 йилда маҳсулотлар экспорти 1,6 миллиард долларни ташкил қилган, экспортчи корхоналар сони 780 дан ошган. Бундан ташқари, яна 120 янги корхона экспорт фаолиятига жалб қилинган.