Афғонистон Адлия вазирлиги эркак ходимларнинг зудлик билан ишга қайтишини талаб қилди

7 сентябр куни “Толибон” ҳаракати Афғонистон Вазирлар Маҳкамасининг янги таркибини эълон қилганди. Мавлавий Абдулҳаким Исҳоқзай адлия вазири этиб тайинланди.

Фото: Arun Sankar/AFP

Афғонистон Адлия вазирлиги эркак ходимларнинг зудлик билан иш жойларига қайтиши ва фаолиятини бошлашни талаб қилди. Бу ҳақда Afghan Urdu портали хабар бермоқда.

“Афғонистон Адлия вазирлиги эркак ходимларига марказ ва вилоятлардаги иш жойларига зудлик билан қайтишларини талаб қилди, акс ҳолда улар ишдан бўшатилади”, – дейилади хабарда.

Хабарда айтилишича, ушбу буйруқ аёлларга тааллуқли эмас.

“Аёл ходимлар учун яқин вақт ичида алоҳида эълон берилади”, – деб ёзади портал.

7 сентябр куни “Толибон” ҳаракати Афғонистон Вазирлар Маҳкамасининг янги таркибини эълон қилганди. Мавлавий Абдулҳаким Исҳоқзай адлия вазири этиб тайинланди. У “Толибон” ҳаракатининг асосчиларидан бири ҳисобланади.

#Афғонистон #адлия