ҲАМАС исроиллик гаровга олинганларни озод қилишни бошлади

ҲАМАС гуруҳи 13 октябр, душанба куни эрталаб 7 нафар исроиллик гаровга олинганни Халқаро Қизил Хоч қўмитасига топширди. Улар 737 кундан бери асирликда эди.

Озод этиш жараёни Ғазо сектори шимолидаги Нецарим коридорида бошланган. Уч соатдан кейин жанубдаги Хон-Юнус шаҳрида гаровга олинганларни озод қилишнинг навбатдаги босқичи режалаштирилган.

Озод қилинган гаровга олинганлар Исроил мудофаа кучларига (ЦАҲАЛ) топширилиши керак. Ўт очишни тўхтатиш келишувига кўра, асирликда ҳалок бўлганларнинг жасадлари тирик гаровга олинганлар озод этилганидан кейин 72 соат ичида қайтарилиши керак.

Гаровга олинганларнинг оилалари аввалроқ Исроил жанубидаги Реим авиабазасига етиб келган, гаровга олинганлар тиббий кўрикдан ўтиши керак. Шундан сўнг улар ўз оилалари билан учрашадилар. ХҚХҚ озод этишдан бир неча соат олдин гаровга олинганлар билан учрашган ва уларнинг баъзилари оғир аҳволда экани ҳақида маълум қилди, деб хабар беради Исроилнинг «Едиот аҳронот» газетаси.

АҚШ президенти Доналд Трамп гаровга олинганларни озод қилиш маросимига етиб келди. Кейинчалик у тинчлик шартномасини имзолашда иштирок этиш учун Мисрга боришни режалаштирмоқда.

Ўт очишни тўхтатиш ва гаровга олинганларни озод қилиш таклиф қилинган тинчлик режасидаги биринчи қадамдир, дея хабар беради Аssociated Рress. Кейинги қадамлар бўйича қарама-қарши талаблар сақланиб қолмоқда, бу эса можаро ҳақиқатдан ҳам тугаганми ёки йўқми деган ноаниқликни келтириб чиқаради.