Трамп қатнашаётган тадбирда отишма: Оқ уй аъзолари эвакуация қилинди

Вашингтондаги Hilton меҳмонхонасига қуролли шахс бостириб кириб, хавфсизлик ходимларига қарата милтиқдан ўт очди. Шундан сўнг, президент Доналд Трамп ва Мелания Трамп Махфий хизмат агентлари томонидан тадбирдан олиб чиқиб кетилди.

25 апрель — шанба оқшомида (АҚШ вақти билан) бири киши Hilton меҳмонхонаси хавфсизлик назорат пунктига бостириб кириб, хавфсизлик ходимларига қарата милтиқдан ўт очди. Ўша вақтда бинода ҳар йили ўтказиладиган тадбир — Оқ уй мухбирлари ассоциацияси билан кечки овқат бўлаётганди. Hilton меҳмонхонасининг ертўласи — базм залида ўтаётган тадбирда Трамп кабинетининг кўплаб аъзолари ва бошқа юқори мартабали маъмурият расмийлари ҳам қатнашаётганди.

Оқ уй эълон қилган видеокузатув кадрларида кимдир хавфсизлик назорат пункти орқали тезлик билан югуриб ўтаётгани, хавфсизлик ходимлари қуролларини тезда чиқаришдан олдин бир лаҳзага саросимада қолгани кўринади.

"A man charged a security checkpoint armed with multiple weapons, and he was taken down by some very brave members of Secret Service." - President Donald J. Trump pic.twitter.com/N3UTveVNFM
— The White House (@WhiteHouse) April 26, 2026

ФҚБ мулозими Reuters агентлигига айтишича, қуролланган шахс Махфий хизмат агентига қарата ўт очган. расмийларга кўра, офицерни ўқ ўтказмайдиган жилети сақлаб қолган ва унинг аҳволи «яхши».

Ўқ овозларидан сўнг, кечки овқат иштирокчилари суҳбатни дарҳол тўхтатди. Одамлар: «Ётинглар, ётинглар!» деб бақира бошлаган. 2600 нафар иштирокчининг кўпчилиги пана жойга яширинди, официантлар эса овқатланиш залининг олд қисмига қараб қочишди.

Хавфсизлик агентлари Оқ уй аъзоларини, жумладан давлат котиби Марко Рубио, соғлиқни сақлаш котиби Роберт Ф.Кеннеди ва ички ишлар котиби Даг Бергумни ерга ётқизишди. Ҳарбий кийимдаги бошқа хавфсизлик ходимлари саҳнага бостириб кириб, Трамп ва унинг рафиқасини эвакуация қилишди.

BREAKING: Trump was just rushed off the stage during the White House Correspondents’ Dinner. pic.twitter.com/s9w1FW9BJ7
— Clash Report (@clashreport) April 26, 2026

Трамп ва биринчи хоним Махфий хизмат офицерлари томонидан олиб чиқиб кетилишидан олдин минбар ортига яширинган . Reuters манбасига кўра, Трамп саҳна ортида тахминан бир соат қолган. Манбанинг айтишича, унинг «Биз қоламиз», деган сўзлари эшитилган.

Баъзи хавфсизлик ходимлари милтиқларини залга қаратган ҳолда саҳнада позиция эгаллашди. Администрациянинг бошқа аъзолари тадбир ўтказилаётган жойдан бирма-бир эвакуация қилинди. Махфий хизмат матбуот котиби Энтони Гулелми хизмат тадбирга кириш қисмидаги асосий текширув ҳудуди яқинида содир бўлган отишмани текшираётганини айтди.

«Касал одам» деб таърифланган гумонланувчи ҳибсга олинган, кечки овқатдаги барча федерал мулозимлар, жумладан Трамп ҳам хавфсизликда.

Трамп ҳодисадан кейин баёнот берди

Ҳодисадан тахминан икки соат ўтгач, Трамп Оқ уйда журналистларга офицерни ўқ ўтказмайдиган жилети сақлаб қолганини ва унинг аҳволи «яхши» эканини айтди.

«Бир киши бир нечта қурол билан қуролланган ҳолда хавфсизлик назорат пунктига бостириб кирди ва у Махфий хизматнинг баъзи жуда жасур аъзолари томонидан зарарсизлантирилди», деди Трамп ҳодисадан кейин Оқ уйда ўтказилган матбуот анжуманида.

«Биласизми, у тахминан 45 метр масофадан бостириб келди, шунинг учун у залдан жуда узоқда эди. У ҳаракатда эди. У ҳақиқатан ҳам тез ҳаракат қилаётган эди», деди Трамп тантанали кечки овқат бекор қилинганидан кейин.

Расмийлар унинг ёлғиз ҳаракат қилганига ишонишмоқда. Трампнинг айтишича, федерал агентлар ҳужумда гумонланаётган шахснинг Калифорниядаги уйида тинтув ўтказмоқда.

Трамп ижтимоий тармоқларда ушбу кечки овқат 30 кундан кейин қайта ташкил этилишига умид қилишини ёзди.

Трампга суиқасдлар

Доналд Трамп 2024 йилда қайта сайланиш учун кампания олиб бораётганда икки марта суиқасд нишони бўлган эди.

Энг жиддий уриниш 2024 йил июль ойида Пенсилвания штатининг Батлер шаҳридаги очиқ майдонда ўтказилган митинг пайтида содир бўлган. Трамп 20 ёшли қуролланган шахс томонидан қулоғининг юқори қисмидан ўқ еб яраланган эди. Ҳужумчи хавфсизлик ходимлари томонидан отиб ўлдирилган.

Батлердаги отишмадан икки ойдан кўпроқ вақт ўтгач, Махфий хизмат агентлари Флорида штатидаги Trump International гольф клубида Трамп майдонда бўлган вақтда буталар орасида милтиқ кўтарган ва яширинган одамни пайқаб қолишган. Бу суиқасдга уриниш деб топилди ва гумонланувчи февраль ойида умрбод қамоқ жазосига ҳукм қилинди.