Адам «тирилди», Ким меросхўр танлади, Ғазога футбол қайтди – ҳафта дайжести

Ассалому алайкум, азизлар. Бугун 15 феврал, якшанба. Ҳафта давомида дунёда қизиқ ишлар бўлди. Америка Европа билан иттифоқчи бўлмоқчи эмаслигини билдирди, лекин Кавказ давлатлари билан муҳим келишувлар имзолади. КХДР лидери Ким ўзига сиёсий меросхўр танлади, Адам Қодиров отасининг таъбири билан айтганда «тирилиб келди». Қуйида ҳафтанинг баъзи муҳим воқеаларини биргаликда эслаймиз.

АҚШ кучли иттифоқчи истамоқда

Ҳафтанинг энг муҳим тадбири Германияда ўтказилди. Анъанавий Мюнхен хавфсизлик конференцияси бу йил ҳам асосан Украинадаги урушга бағишланди. Унда қатнашган АҚШ давлат котиби Марко Рубио амалда ҳеч қандай янгилик айтмади, Америка бош дипломати Вашингтон Европа билан иттифоқчи бўлишни истамаётганини айтди. Албатта, бу гапни олдинги анжуманда қатнашган вице-президент Вэнс каби қўпол тарзда эмас, бироз юмшоқроқ оҳангда айтди, лекин мазмун ўша.

Рубионинг айтишича, Америка кучсиз иттифоқчига эга бўлишни истамас экан, уларга ўзини ҳимоя қила оладиган иттифоқчи керак экан. Котиб европаликларни иқлим муаммоси сабаб яшил энергетикага ўтишга уринаётгани ва миграция сиёсати учун ҳам танқид қилди: «Биз иқлимни баҳона қилиб энергетика сиёсатида ўзимизни чеклаётганда, рақобатчиларимиз кўмир ва газни нафақат ўз иқтисодиёти учун, балки бизга босим ўтказиш учун ишлатмоқда. Биз бошқариб бўлмас миграция тўлқини учун эшигимизни ланг очиб қўйдик».

Давлат котиби ўз нутқини юқори нотада якунлади ва америкаликларни «Европа болалари» деб атади: «Сарлавҳаларда трансатлантика даври ўтгани айтилмоқда, лекин ишонинг, бу бизнинг мақсадимиз эмас. Биз америкаликлар учун Ғарбий яримшар уйимиз бўлса ҳам, доим Европанинг болалари бўлиб қоламиз».

Якун чиройли бўлди, лекин европаликлар бу чиройли гапларга ишонди дея олмайман. Масалан, Рубиодан кейин саҳнага чиққан Еврокомиссия президенти Урсула фон дер Ляйен хоним Вашингтоннинг оҳанги ўзгарганига қарамай, Европа ва АҚШ муносабатлари таранглигича қолаётгани, ўртада унутиш имконсиз бўлган ишлар бўлиб кетганини айтди.

Келиб чиқиши кубалик бўлган давлат котиби «америкаликлар Европа болалари» экани ҳақидаги гапини келиб чиқиши немислардан бўлган хўжайини мистер Трампдан сўраб гапирдими-йўқми, билмадим. Президент Трамп Европа манзилига айтган гапларини унутиш чиндан имконсиз. Ахир Европа Иттифоқига аъзо давлатга ерини босиб олиш билан ҳатто Россия таҳдид қилмаган.

Адам Қодиров «тирилди»

Жуда кўп ўзбекистонликлар яхши кўрадиган Рамзан Қодиров ҳафтанинг энг шов-шувли видеоларидан бирини эълон қилди. Олдинроқ Қодировнинг меросхўр ўғли Адам Қодиров автоҳалокатга учраганди. Чеченистон раҳбари бу хабарларни ёлғон деб атаб келди. Лекин отаси томонидан очиқчасига ўринбосар ўлароқ тайёрланаётган Адам Қодиров кўринмай қолгани, Грознийдаги воқеалар, Москвага Қодировнинг самолётлари серқатнов бўлгани чиндан нимадир бўлганидан дарак эди.

Қодиров ўғли Адамнинг янги видеосини эълон қилди. Унда 18 ёшли меросхўрнинг озиб қолгани, юз шакли ҳам ўзгарганини кўриш мумкин. Қодиров видеода ўз услубига хос чеченча гапирган ва орада ўғлини кўрсатиб, русчада «воскресший», яъни тирилиб келган, деган. Боланинг ташқи кўриниши кескин ўзгарганини сезиш қийин эмас.

Россия мустақил нашрларининг ёзишича, автоҳалокатдан кейин кичик Қодировни Москвадаги Боткин касалхонасига олиб кетишган. Чеченистон ҳаётини фаол ёритувчи «Новая газета Европа» нашрининг ёзишича, Адамнинг жағ суягида ёриқ аниқланган, шу сабаб унга қаттиқ овқатлар ейиш тақиқланиб, олти ой қатъий парҳез белгиланган. Унда кўриш билан боғлиқ муаммо пайдо бўлган, шунингдек, талоғи олиб ташланган бўлиши мумкин.

Вэнс Кавказда

АҚШ вице-президенти Жей Ди Вэнс ҳафта давомида Арманистон ва Озарбойжонга борди. Аввалига Ереванга борган Вэнс Вашингтон бўлажак сайловларда Никол Пашинянни қўллашини билдирди. Арман армиясига Американинг разведка дронлари етказиб бериладиган бўлди. Вэнс Вашингтон ва Ереван ўртасидаги ядровий келишув ҳақида ҳам эълон қилди. Бу келишув Америка Арманистонда кичик ядро реакторлари қуришига йўл очади.

Шунингдек, Америка Арманистон IT-секторига 4 миллиард доллар инвестиция киритади. Вашингтон Nvidia компанияси Арманистонга 41 мингта чип сотишига рухсат беради. Пашинян ва Вэнс Озарбойжоннинг асосий қисмини мамлакатга тегишли Нахичевон эксклави билан боғлайдиган Арманистон орқали ўтувчи йўл масаласини ҳам муҳокама қилди. Йўлнинг номи нима эканини биласизми? Трамп маршрути. Америка президенти Пашинян ва Алиевни Вашингтонда учраштириб, йўл қуришга ёрдам беришини айтган ва уни ўз номи билан аталишини таклиф қилганди.

Шу тариқа Америка вице-президенти тарихда илк марта Арманистонга борди. Тарихда илк марта Арманистон армиясида Америка қуроли бўлади. Маълумот учун, Арманистон ҳамон Россиянинг иттифоқчиси...

Еревандан кейин Вэнс Бокуга борди. У ерда АҚШ ва Озарбойжон ўртасида ҳарбий ҳамкорлик, атом энергетикаси, киберхавфсизлик соҳасидаги ҳамкорлик бўйича хартия имзоланди. Вэнс Алиевга ҳам Америка қуроллари, хусусан, Каспийда чегарани қўриқлаш учун картерлар ваъда қилди.

Вэнснинг Кавказга ташрифи Россиянинг минтақадаги таъсири пасайиб бораётганини исботлади. Ҳозир Арманистон ҳам, Озарбойжон ҳам Россия билан яхши муносабатда эмас. Ереван Қорабоғ урушида Россия арманларга ёрдам бермади, деб ҳисоблайди. AZAL авиакомпанияси самолёти Россия ҳарбийлари томонидан ўққа тутилганидан кейин Бокунинг ҳам Москва билан муносабатлари совуқлашди. Алиев очиқчасига бўлмаса ҳам Россия Украинага бостириб киргани ҳақида гапирди. Куни кеча Алиев Мюнхен конференцияси доирасида Украина президенти Зеленский билан учрашиб, Россияни Озарбойжоннинг Украинадаги элчихонасига атай зарба беришда айблади.

«Уруш битта қўнғироқ билан тугаши мумкин»

Мюнхен конференциясида чиқиш қилган АҚШнинг НАТОдаги элчиси Мэтю Уитакер қизиқ гап айтди. Унинг фикрича, Хитой Украинадаги урушни биргина қўнғироқ билан тугатиши мумкин экан: «Хитой Путинга қўнғироқ қилиши ва эртагаёқ урушни тугатиши мумкин». Унинг фикрича, Хитой Россияга икки мақсадли товарларни сотишни, рус гази ва нефтини сотиб олишни бас қилса, Кремл урушни тугатишга мажбур бўларкан.

Айтганча, шу кунларда Украина Хитой билан алоқаларни яхшилашга киришиб қолди. Икки давлат ташқи ишлар вазирлари учрашди, Украина бош дипломати Сибиганинг айтишича, давлат раҳбарлари доирасида учрашув ҳам бўлиши мумкин экан. Сибигага кўра, Украина томони Хитой Россияга одам ўлдирадиган қурол етказиб бермаяпти деган хулосага келган. Шунингдек, дипломат Хитой Украинанинг ҳамон энг йирик савдо ҳамкори эканини эслатди.

Лекин америкалик чиновник айтганидек Хитой урушни битта қўнғироқ билан тугата олмайди. Бу битта телефонда ҳал қилинадиган кўча уруши эмас. Жаноб Уитакер, ҳозир битта телефон билан фақат пицца буюртма қилишингиз мумкин, ўшанда ҳам линия банд бўлмаса. Дунёда ҳозирги урушни тугата оладиган битта телефон бор, смартфон эмас, оддий уй телефони. Қизил майдон яқинидаги бир кабинетда турадиган ўша телефондан қўнғироқ қилиб «бўлди, тугатинглар», дейилсагина уруш тугаши мумкин. Бошқа телефонларнинг бунга кучи етмайди. Тугатса, Оқ уйдаги телефон тугатган бўларди.

Ким меросхўр танлади

Шимолий Корея етакчиси Ким 14 ёшли қизи Ким Жу Аени ўзининг ўринбосари сифатида танлаб бўлибди. Бу ҳақда Жанубий Корея разведкасига таяниб Reuters ёзиб чиқди. Жанублик разведкачилар борган сари кўпроқ омма олдида кўриниш бераётган кичик Ким ҳарбий йиғилишларда ҳам қатнашаётганига эътибор қаратган. Қизалоққа тез орада партия доирасида лавозим берилиши ҳам мумкин экан.

Ҳафта суратлари

Бугундан ҳафталик дайжестларимизни ҳафта суратлари билан якунлашга қарор қилдик. Дунё катта, зўр сураткашлар кўп, ҳар ҳафта жуда яхши кадрлар эълон қилинади. Уларни сизга улашиб борсак, менимча, қизиқарли бўлади.

Ҳафта давомида Оқ уй севишганлар кунига бағишлаб ғалати совға суратлари эълон қилди. Ўзи Трампнинг иккинчи муддатида Оқ уйнинг Twitter аккаунти худди кўнгилочар саҳифалар каби ишламоқда. Биласиз, ғарбликлар 14 феврални севишганлар куни сифатида нишонлайди, нега бунақа байрам қилишларини тўғриси тушунмайман. Худди инсон севган одамини фақат бир кун севадигандай.

Оқ уй эълон қилган суратларда иккитаси ажралиб туради. Улардан бирида Венесуэла президенти Николас Мадуронинг америкалик ҳарбийлар томонидан қўлга олингандаги расми тасвирланиб, унга «сен менинг юрагимни забт этдинг» деб ёзилган. Яъни You captured my heart. Captured сўзи қўлга олиш маъносида ҳам ишлатилади. Шу тариқа Оқ уйдагилар сўз ўйини қилган. Бошқа бир картинада юрак ичида Гренландия тасвирланиб, унга «муносабатларимизга ойдинлик киритиб олишимиз керак» деб ёзилган.

Ҳафтанинг энг зўр сурати эса Муҳаммад Иса деган журналист томонидан Ғазода олинди. Журналист вайроналар орасидаги футбол майдонида тўп тепаётган ғазоликларни суратга олди. Айниқса юқоридан олинган кадр жуда зўр чиққан. Тўрт томонда Исроил кулини кўкка совурган шаҳар, вайроналар ва ўртада футбол майдонида тўп тепаётган ёш йигитлар.

Бу ажойиб ўйин менга ҳаётни эслатади, балки мен футболсиз ҳаётимни тасаввур қила олмаганим учун шундайдир. Футбол бу – кураш, ҳалол кураш, тенг кураш, ҳамманинг имконияти бир хил. Натижа ҳеч қачон ёлғиз ўзингга боғлиқ эмас, доим ёнингда сени тушунадиган шерикларинг, майдон четида хатоларингни кўрсатадиган доно мураббий бўлиши керак.

Футболда доим ғалаба қозониш имконсиз, лекин доим ғалаба учун курашасан, худди ҳаётда бўлгани каби. Доим ғалаба учун курашиш инсон ҳаётига мазмун бағишлайди, унга битмас-туганмас мотивация ва адреналин беради. Исроил абсурд иддаолари билан Ғазони йўқ қилмоқчи бўлди, лекин бунинг уддасидан чиқолмади. Ғазолик йигитлар вайроналар остидан омон чиқиб, бугун яна футбол ўйнамоқда. Улар яна ғалаба учун олдинга бормоқда.

Футболда ғалаба учун ҳеч қачон тўхтаб қолмаслик муҳим, худди ҳаётда бўлгани каби. Ҳеч қачон ҳаракатдан, олдинга интилишдан тўхтамаслик керак. Ғалаба, албатта, келади. Омон бўлинг, азизлар. Ҳаракатдан тўхтаманг, ғолиб бўлинг ва албатта, футбол томоша қилинг.