АҚШ 55 миллиондан ортиқ виза эгаларини текширади

Виза талаблари бузилган тақдирда, у бекор қилинади ва чет эллик мамлакатдан чиқариб юборилади.

Фото: AP

АҚШ Давлат департаменти 21 август куни амалдаги Америка визасига эга бўлган 55 миллиондан ортиқ хорижликнинг миграция қонунчилигини бузиш эҳтимоли бўйича текшираётганини маълум қилди, деб хабар берди AP.

Давлат департаменти агентликка АҚШ визалари эгаларининг қоидаларга мувофиқлигини «доимий равишда» текшириб туришини маълум қилди. Хусусан, идора виза муддати ўтган-ўтмаганини, шахснинг жиноятчилик ёки терроризмга алоқадорлигини ўрганади. Агар чет эллик бу талабларни бузган бўлса, унинг визаси бекор қилинади. Агар у АҚШ ҳудудида бўлса, мамлакатдан чиқариб юборилади.

Давлат департаментида таъкидланишича, Доналд Трампнинг 2025 йил январидаги инаугурациясидан бери идора ўтган йилнинг шу даврига нисбатан икки баравар кўп визани бекор қилган. Шу билан бирга, бекор қилинган талаба визаси сони тўрт баравар ошган.

Август ойи бошида Давлат департаменти талаба визасига эга 6 мингдан ортиқ шахс мамлакатда бўлиш муддатини бузгани, шунингдек, қонунбузарликлар, жумладан, ҳужумлар, маст ҳолда машина ҳайдаш ва терроризмни қўллаб-қувватлагани учун бекор қилингани ҳақида хабар берди. Аниқлик киритилишича, тўрт мингга яқин виза қонун бузилиши, 200-300 га яқин виза терроризм билан боғлиқ сабабларга кўра бекор қилинган.

Тайёрлаган: Сардор Юсупов

#АҚШ #виза #миграция