Қўшимча функционаллар
-
Тунги кўриниш
Хитой Тайван туфайли АҚШга қарши санкциялар жорий қилди
Пекин Тайван билан ҳар қандай алоқаларни ўз суверенитети ва ҳудудий яхлитлигига путур етказиш, деб баҳолайди. Шунинг учун Хитой Америка компаниялар ва уларнинг раҳбариятига нисбатан санкциялар жорий қилди.
Фото: Dominika Zarzycka/NurPhoto/picture alliance
Хитой Тайванга қурол сотилиши муносабати билан АҚШнинг 10 нафар жисмоний шахси ва 20 та мудофаа (ҳарбий) компаниясига нисбатан санкциялар жорий қилди. Бу ҳақда Пекиндаги Ташқи ишлар вазирлиги жума куни, 26 декабрда маълум қилди. Хитойнинг “суверенитети ва ҳудудий яхлитлигига путур етказувчи” қурол етказиб беришлар учун қўлланган жазо чоралари шу куннинг ўзида кучга кирган.
Хусусан, санкция рўйхатига Northrop Grumman ҳарбий-саноат корпорацияси, шунингдек Boeing компаниясининг Сент-Луисдаги (Миссури штати) филиали киритилди. Хитой ТИВ таъкидлашича, рўйхатга киритилган жисмоний шахслар санкция жорий этилган корхоналарнинг юқори раҳбарияти вакилларидир.
Хабарга кўра, санкцияга тушган компаниялар ва хусусий шахсларнинг Хитойда жойлашган барча активлари музлатилади. Бундан ташқари, Хитой ташкилотлари ва фуқароларига улар билан бизнес юритиш тақиқланади. Санкция рўйхатидаги шахсларга Хитойга кириш ҳам ман этилади.
Декабр ўртасида АҚШ маъмурияти Тайванга 11,1 млрд долларлик энг йирик қурол пакети сотилишини маъқуллагани ҳақида хабар берилган эди. Тайбэй ҳукумати тарқатган маълумотларга кўра, пакет таркибига HIMARS реактив ялпи ўт очиш тизимлари, Javelin танкка қарши ракеталари, Altius дронлари, гаубицалар ва бошқа ускуналар учун эҳтиёт қисмлар кирган.
Хитой Халқ Республикаси Тайванни ўзининг “исёнкор провинцияси” деб ҳисоблайди ва орол билан бошқа давлатлар ўртасидаги ҳар қандай расмий алоқаларни қатъий рад этади.
