Тиббий ниқобсиз юрган фуқаролар шу пайтгача камида 279 млрд сўмдан зиёд жарима тўлашган

Ҳудудлар кесимида бу борада энг кўп қоидабузарлик Тошкент вилояти (215764 та), Тошкент шаҳри (163383 та) Самарқанд (109205 та) ва  Фарғона (161879 та) вилоятларида кузатилган. Энг кам кўрсаткич Қорақалпоғистон Республикаси (30534 та), Хоразм (29209 та) ва  Навоий (22346 та) вилоятларида қайд этилган.

Тиббий ниқоб тақмагани учун 2020 йил 16 мартдан 2021 йил 18 июлгача Қашқадарёда – 80833, Наманганда – 79270, Сурхондарёда – 58807, Андижонда – 56544, Сирдарёда – 50748, Бухорода – 42948, Жиззахда – 38402 нафар шахс жарима тўлаган.

Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш)га кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг беш бараваригача (245 минг сўмдан 1 млн 225 минг сўмгача) миқдорда жарима солишга сабаб бўлади.

Тиббий ниқоб тақмагани учун маъмурий жавобгарликка тортилган ўзбекистонликлар тўлаган жарималар миқдори маълум эмас. 1 млн 139 минг 872 нафар кишининг барчаси базавий ҳисоблаш миқдорининг бир баравари миқдорида жаримага тортилган, деб тахмин қилсак, тўланган жами жарима суммаси энг камида 279 млрд 268 млн 640 минг сўмни ташкил этади. Айрим ҳуқуқбузарлар базавий ҳисоблаш миқдорининг икки ёки ундан юқори баравари миқдорида жавобгарликка тортилганини инобатга олсак, жами жарима миқдори анча юқори бўлиши мумкин.

Аввалроқ, пандемия даврида карантин қоидаларига амал қилмагани учун 1 млн 163 минг 27 нафар шахс маъмурий жавобгарликка тортилгани маълум қилинганди.