Исроилда ҳалок бўлганлар Ўзбекистон паспортига эга эмас – элчихона

Ўзбекистоннинг Исроилдаги элчихонаси ижтимоий тармоқларда тарқалган хабарларга изоҳ берди.

Фото: Atef Safadi/EPA-EFE/Shutterstock

Исроил-ҲАМАС қарама-қаршилиги оқибатида Ўзбекистон фуқаролари ҳалок бўлмади. Бу ҳақда Ўзбекистоннинг Исроилдаги элчихонаси хабар берди.

«Исроил Ташқи ишлар вазирлиги ва полицияси берган маълумотга кўра, мамлакат жанубида рўй берган террор ҳужуми вақтида Ўзбекистонда туғилган ва 90-йилларда репатриация дастурига мувофиқ Исроилга кўчиб кетган 5 нафар киши ҳалок бўлган. Олинган маълумотларга кўра, улар амалдаги Ўзбекистон фуқаролик паспортига эга эмас», дейилади хабарда.

Аввалроқ, Исроил Ташқи ишлар вазирлигининг русийзабон канали Исроил-Фаластин зиддияти оқибатида Ўзбекистоннинг 3 нафар фуқароси ҳалок бўлгани, 4 нафари бедарак йўқолгани ҳақида хабар берган, шу билан бирга, маълумотлар аниқлаштириш жараёнида эканини қўшимча қилган эди.

Тайёрлаган Сардор Юсупов

#Исроил #Фаластин #элчихона

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.