Мажбурий ижро бюросининг Kun.uz’га маълум қилишича, Қашқадарё вилоятининг Чироқчи туманида ота бир нафар фарзандининг алименти учун 45 млн сўм тўлаб берган.
Фуқаролик ишлари бўйича Чироқчи туман судининг қарорига асосан 1 нафар вояга етмаган фарзандининг моддий таъминоти отага юклатилган бўлиб, МИБ туман бўлими ходимлари томонидан қарздор алимент тўловларини тўлаши юзасидан огоҳлантириб келинган бўлса-да, ота суд буйруғида белгиланганидан кўра кам миқдорда алимент тўлаб келган.
Масъул давлат ижрочиси томонидан қарздор билан профилактик суҳбатлар олиб борилиб, қонунчиликда белгиланган жавобгарлик юзасидан тушунтириш берилган. Натижада фуқаро алиментдан бўлган барча қарзини тўлаш билан бирга фарзанди вояга етгунига қадар ҳисобланган алимент пулини тўлаш истагини билдирган.
13 апрель куни келишув битими асосида қарздор ота томонидан тўланган 45 млн 200 минг сўм алимент пули собиқ рафиқасига топширилган.
Аввалроқ булунғурлик ота фарзандининг алименти учун 200 миллион сўм, сирдарёлик ота машинаси хатлангач, фарзандларига 31 миллион сўм алимент тўлаб берган, алиментни ўз вақтида тўламаган андижонлик икки нафар ота 15 суткага қамалган эди.
Бундан ташқари, Самарқандда алиментдан қарз бўлган ота 67 миллион сўм қарзини тўлаб, фарзандларига уйини ҳам берган бўлса, Қўқонда алимент тўлови ўрнига «Spark», Бухорода эса уй ва «Nexia-2» калитлари топширган эди.
