Ўзбекистонда озиқ-овқат хавфсизлигини таъминлаш миллий дастури тасдиқланади

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “2019-2024 йилларда мамлакатда озиқ-овқат хавфсизлигини таъминлаш миллий дастурини тасдиқлаш тўғрисида”ги қарори лойиҳаси жойлаштирилди.

Қуйидагилар озиқ-овқат хавфсизлигини таъминлашнинг асосий йўналишлари этиб белгиланади:

озиқ-овқат хавфсизлиги соҳасида меъёрий-ҳуқуқий базани такомиллаштириш;

қишлоқ хўжалигига мўлжалланган ерлар ва сув ресурсларидан оқилона фойдаланиш;

асосий турдаги қишлоқ хўжалик ва озиқ-овқат маҳсулотлари, хом-ашёни ички ишлаб чиқаришни барқарор ривожлантириш;

чорвачилик, паррандачилик, балиқчилик соҳасини барқарор ривожлантириш, маҳсулот ишлаб чиқариш ҳажмларини кўпайтириш, озуқа базасини мустаҳкамлаш;

қишлоқ хўжалиги ва озиқ-овқат маҳсулотлари ишлаб чиқариш инфратузилмасини яхшилаш;

озиқ-овқат маҳсулотлари хавфсизлигини таъминлаш;

аҳолини барча қатламларини озиқ-овқат маҳсулотлари билан таъминланиши учун иқтисодий имкониятларини ошириш;

озиқ-овқат хавфсизлигини таъминлашни давлат томонидан тартибга солиш ва назорат қилиш.

2019-2024 йилларда мамлакатда озиқ-овқат хавфсизлигини таъминлаш миллий дастури тасдиқланади.

Қуйидагилар озиқ-овқат хавфсизлигини таъминлашнинг ички омиллари ҳисобланади:

қишлоқ хўжалигида озиқ-овқат маҳсулотлари етиштиришда фойдаланиладиган ер ва сув ресурсларининг ҳажми, сифати ва улардан самарали фойдаланиш имкониятлари;

озиқ-овқат маҳсулотлари, шу жумладан экологик тоза маҳсулотлар ишлаб чиқариш, сақлаш ва сотиш соҳасига инновацион технологияларни жорий қилиш даражаси;

ички ва ташқи бозорларда мамлакатда ишлаб чиқарилаётган озиқ-овқат маҳсулотларининг рақобатбардошлик даражаси;

миллий озиқ-овқат саноати салоҳиятининг ривожланганлик ҳолати;

озиқ-овқат маҳсулотлари импорти ва экспортининг нисбати;

аҳоли кенг қатламларининг озиқ-овқат маҳсулотларига бўлган талабини маҳсулот турлари, ҳажми ва сифати бўйича ички ишлаб чиқариш ҳисобига таъминлаш даражаси;

аҳоли даромадларига мос ҳолда истеъмол товарлари нархларининг ўсиш суръати;

нави ва сифати кафолатланган, ички ва ташқи бозорларда харидоргир бўлган маҳаллий уруғ ва кўчат таъминотининг барқарорлиги;

чорва ҳайвонларининг зотини яхшилаш ва маҳаллий зотларнинг маҳсулдорлигини ошириш бўйича селекция ва наслчилик ишларининг тизимли ташкил этилганлиги;

ички бозор коньюнктураси талабини мунтазам ўрганиб бориш асосида талаб ва таклифнинг мувофиқлаштириш тизимининг мавжудлиги;

қишлоқ хўжалиги озиқ-овқат маҳсулотлари ишлаб чиқаришга талаб этиладиган моддий-техник ресурслар таъминотининг барқарорлиги ҳамда маҳсулотлар баҳолари ва уларни ишлаб чиқаришга сарфланадиган моддий-техника ресурслари ва кўрсатиладиган хизматлар нархларининг ўсиш даражасининг мутаносиблиги;

ҳудудларда, айниқса қишлоқ жойларда инфратузилмани ривожланиш даражаси ва уни рағбатлантириш механизмларининг мавжудлиги;

табиий яйловларнинг ҳосилдорлиги ва улардан самарали фойдаланиш тизимининг йўлга қўйилганлиги;

ишлаб чиқаришни ривожлантириш учун айланма маблағларнинг етишмаслиги ва банк кредитларининг юқорилиги;

хом-ашё етказиб берувчи ва қайта ишловчилар ўртасидаги шартномавий муносабатларнинг бозор механизмларига мувофиқлиги.

Қуйидагилар озиқ-овқат хавфсизлигини таъминлашнинг ташқи омиллари ҳисобланади:

озиқ-овқат маҳсулотларига дунё бўйича нархни ортиб бориши ва ривожланаётган давлатлар талабининг кўпайиши;

иқлим шароитларининг ўзгариши;

биоёқилғи ишлатиш кўламининг кўпайиши;

геосиёсий омиллар.

Озиқ-овқат хавфсизлигини таъминлаш механизмлари белгиланган мақсадли мезонлар асосида қуйидаги тадбирлар уйғунлигида амалга ошириш орқали таъминланади:

республиканинг барча ҳудудлари даражасида озиқ-овқат хавфсизлигини аниқлаш, баҳолаш ва кутилиши мумкин бўлган хавфни олдиндан билиш тизимини жорий қилиш;

озиқ-овқат хавфсизлигини таъминлаш бўйича халқаро талабларга уйғунлашган меъёрий-ҳуқуқий ҳужжатлар тизими жорий қилиш;

республиканинг барча ҳудудлари даражасида белгиланган мақсадли мезонларни бажаришни таъминловчи агросаноат мажмуасини барқарор ривожлантириш ва озиқ-овқат хавфсизлигини таъминлашни тартибга солиш ва бошқариш тизимини жорий қилиш.