“Ҳамма шартли ном билан ҳужжатлаштирилган” – Россия армиясига ёлланган наманганлик “Дед” озодликдан маҳрум қилинди

Россия армиясига ёлланган ҳолда Украинага қарши урушда иштирок этган Ўзбекистон фуқароси жиноий жазога тортилди. Kun.uz суд ҳужжати билан танишди.

Суд ҳукмида келтирилишича, Наманган шаҳрида яшовчи 1970 йилда туғилган Р.К. 2023 йилнинг май ойида мавсумий ишлаш мақсадида Россияга борган. Патент олиш мақсадида федерал миграция хизмати идорасига борганида ФМХ ходимлари унга патент берилмаслигини, бироқ Украинага қарши урушда иштирок этса Россия фуқаролиги берилишини ҳамда бемалол ишлаши мумкинлигини айтган.

Р.К. 2023 йил июн ойида урушга бориш учун ўз ҳохишига кўра Россия Қуролли кучлари билан бир йиллик шартнома имзолаган. Унга “Дед” лақаби берилган. Эркак Украинага қарши урушда қатнашаётганлиги учун 700 минг рубл миқдорида бир марталик мукофот пули ва ҳар ой ўртача 150-200 минг рубл ойлик маош олиб келган. Р.К. урушда ҳайдовчи-механик бўлган ва Белгород шаҳридаги ҳарбий қисмда уруш мақсадларида фойдаланиладиган ҳарбий транспорт воситаларини техник таъмирлаш ишлари билан шуғулланган.

Р.К. судда айбига тўлиқ иқрорлик билдирган ва урушга озроқ бўлса-да пул топиб, рўзғорига ишлатиш мақсадида борганини айтган.

“2023 йил май ойида ишлаш учун Санкт-Петербург шаҳрига бордим. Шаҳардаги федерал миграция хизмати идорасига патент олиш мақсадида мурожаат қилганимда аввал Россия ҳудудида хуқуқбузарликлар содир этганим учун менга патент берилмаслигини айтишди. Ишлашим керак, патент беринглар дедим. Шунда Россия қуролли кучлари билан шартнома тузишимни маслаҳат беришди ва бу орқали Россия фуқаролигини олишим мумкинлигини маълум қилишди. Мен бу таклифга рози бўлдим.

Санкт-Петербург шаҳридаги Мудофаа ишлари бўлимига бориб, Украинага қарши урушда иштирок этиш мақсадида шартнома имзолаш учун ариза топширдим. Фақат 50 ёшгача бўлган фуқаролар ҳарбий хизматга олинаётганини, 50 ёшдан ошганлар эса фронт ортида хизматга жалб этилаётганини билдиришди. Орадан бир неча ҳафта ўтгач Мудофаа ишлари бўлими ходими алоқа чиқиб, менга камида 1 йил муддатга шартнома тузишни таклиф қилди. 2023 йил 25 июл куни 1 йил муддатга шартнома имзоладим.

Менга шахсий житон рақами берилди. Ёшим катта бўлгани учун “Дед” шартли номи билан ҳужжатлаштиришди. У ерда ҳаммага алоҳида исм қўйиб, ҳужжатлаштиришади. Ўша вақтда менга 700 минг рубл мукофот пули берилди”, деган эркак суддаги кўрсатмасида.

Шундан сўнг Р.К. 2023 йил июл-август ойларини Санкт-Петербург шаҳридаги махсус ҳарбий базада бошқа ёлланма ҳарбий хизматчилар тўпланишини кутиб ўтказган. Шартнома имзолаган ёлланма ҳарбий хизматчилар тўплангач улар ёшига қараб сараланган.

“2023 йил сентябр ойларида Белгорад шаҳридаги ҳарбий қисмга юборишди. У ерда мен ҳайдовчи-механик сифатида ишладим. Хизматим давомида менга 2 минг доллар миқдорида ойлик маош тўланган. Пуллар турмуш ўртоғим номига келиб тушарди.

2024 йил апрел ойининг ўрталарида соғлиғимдаги ўзгаришлар туфайли Белгорад шаҳридаги кўп тармоқли ҳарбий поликлиникага мурожаат қилдим. Бироқ у ерда махсус шифокор бўлмагани сабабли мени Санкт-Петербург шаҳридаги ҳарбий госпиталга жўнатишди. 1 ой давомида “юрак ишемик” ташхиси билан даволандим”, деган у.

Р.К. 2024 йил июн ойида Ўзбекистонга қайтиб келган.

2025 йил апрел ойида Украина ҳукуматига алоқадор «Хочу жить» («Мен яшашни хоҳлайман») лойиҳаси Россия армияси билан шартнома тузиб, Украинага қарши урушда қатнашган 1100 киши ҳақидаги маълумотларни ошкор қилганди. Улар Россия армияси сафида ҳарбий ҳаракатларда қатнашаётган ёки қатнашган (ҳалок бўлган ёки шартнома муддати якунланган) Ўзбекистон фуқаролари экани айтилган. Рўйхатга Украинага асирга тушганлар киритилмаган.

Р.К. ана шу рўйхатдаги 1100 ўзбекистонликнинг бири бўлиб чиқди. У рўйхатда 392-рақамда, МТ-891289 шахсий рақами остида келтирилган.

Жиноят ишлари бўйича Наманган шаҳар судининг ҳукми билан Р.К. Жиноят кодексининг 154-моддаси (Ёлланиш) 1-қисмида назарда тутилган жиноятни содир қилганликда айбли деб топилган. Унга 2 йил муддатга озодликдан маҳрум қилиш жазоси тайинланган. Жазони умумий тартибли колонияларда ўташ белгиланган.

Аввалроқ Россия армиясига ёлланган навоийлик йигит 4 йил муддатга озодликни чеклаш жазосига тортилганди. У ҳарбий бўлинмага бошига қоп кийдирилган ҳолда олиб борилганини айтган.