Афғонистон президенти келгуси ҳафта Ўзбекистонга ташриф буюради

26-27 март кунлари Тошкентда Афғонистон муаммосига бағишланган «Тинчлик жараёни, хавфсизлик соҳасида ҳамкорлик ва минтақавий ўзаро алоқалар» мавзусида конференция бўлиб ўтади. Тадбирда 20дан ортиқ мамлакат ва халқаро ташкилотлар делегациялари иштирок этади.

Хусусан, Тошкентга Афғонистон президенти Муҳаммад Ашраф Ғани, БМТнинг Афғонистонга кўмак кўрсатиш бўйича миссияси раҳбари Тадамити Ямамото, Европа Иттифоқининг ташқи ишлар ва хавфсизлик сиёсати бўйича Олий комиссари Федерика Могерини келади, дея хабар беришган давлат раҳбари матбуот хизматидан.

АҚШ давлат котиби ўринбосари Томас Шеннон, Россия ташқи ишлар вазири Сергей Лавров, Эрон ташқи ишлар вазири Жавод Зариф, Покистон ташқи ишлар вазири Муҳаммад Асифнинг иштироки тасдиқланди.

Шунингдек, Хитой, Қозоғистон, Қирғизистон, Тожикистон, Туркманистон, Ҳиндистон, Япония, Туркия, Буюк Британия, Германия, Италия, Франция, Саудия Арабистони, Бирлашган Араб Амирликлари делегацияларининг иштирок этиши кутилмоқда.