«Европалик чўчқачалар қулашимиздан умид қилган» — Путин Байден маъмурияти ва европаликларни урушни бошлашда айблади

 17 декабр куни Россия Мудофаа вазирлигининг йиллик йиғилишида нутқ сўзлаган Владимир Путин Киев ва Европа тинчлик музокараларга киришмаса, куч ишлатиш орқали кўпроқ ҳудудларни эгаллашини айтди.

Путин Россия армияси барча йўналишларда олдинга силжиётганини ва ўз мақсадларига куч билан ёки дипломатия орқали эришишини билдирди.

«Агар қарши томон ва уларнинг хориждаги ҳомийлари мазмунли музокараларга киришишни рад этса, Россия ўзининг тарихий ерларини ҳарбий йўл билан озод қилади», — деди Путин.

Москва талқинига кўра, бартараф қилиниши керак бўлган бир неча «илдиз сабаблар» бор. Euronewsʼнинг ёзишича, улар қаторига Украинанинг Европа Иттифоқи ва НАТОга қўшилиш истаклари, шунингдек, НАТОнинг шарққа кенгаймаслик бўйича мажбуриятларни бузиши, Киевнинг этник русларни гўёки камситиши ва «Украинани денатсификация қилиш» деб атайдиган нарса киради.

Бундан ташқари, Путин АҚШнинг собиқ президенти Жо Байден маъмурияти Россияни йўқ қилишга уринганини, европалик сиёсатчилар ҳам худди шу мақсадни кўзлаганини айтди.

«АҚШнинг аввалги маъмурияти вазиятни онгли равишда қуролли тўқнашувга олиб келган. Назаримда, бунинг сабаби ҳам тушунарли. Ҳамма қисқа вақт ичида Россияни барбод қилиш, парчалаб юбориш мумкин деб ўйлаган. «Европалик чўчқачалар» эса дарҳол АҚШнинг аввалги маъмуриятининг бу ишига қўшилиб, мамлакатимиз қулашидан фойда кўришга умид қилган.

'European little pigs' teamed up with Biden, tried to profit from Russia 'collapse' but 'all their plans failed' - Putin pic.twitter.com/irzI8vEGYv

— Viory Video (@vioryvideo) December 17, 2025

Олдинги тарихий даврларда йўқотилган ниманидир қайтариб олиш ва реванш олишга уринишган. Энди барчага аён бўлдики, Россияга қарши қаратилган бу уринишларнинг барчаси, бу бузғунчи режаларининг барчаси тўлиқ барбод бўлди, мутлақо барбод бўлди», деган Путин.

Нашрга кўра, Путин европаликларни ҳақоратлаш учун қўллаган «подсвинки» (чўчқачалар) атамасини аввалроқ Дмитрий Медведев ҳам Ғарб демократияларини ҳақоратлаш учун ишлатган.

У Европа сиёсатчиларини «Россия бир кун келиб НАТО давлатлардан бирига ҳужум қилиши мумкинлиги» ҳақида огоҳлантиришлар бериш орқали ваҳимани атайлаб кучайтиришда айблади.

«Мен бир неча бор айтганман: бу ёлғон, бемаънилик, Европа давлатларига нисбатан қандайдир хаёлий Россия таҳдиди ҳақидаги мутлақо бемаъни гаплар. Аммо бу атайлаб қилинмоқда», — деди Путин.

Яна ядровий таҳдид

У Европани танқид қилишда давом этаркан, ғарбликлар Москва билан мулоқотга қайтишга «умид қилиши»ни айтди. Бироқ «ҳозирги европалик элиталар» билан бундай сценарий эҳтимолдан йироқ, деди.

«Бу ҳозирги сиёсий элиталар билан мумкин бўлиши эҳтимолдан йироқ. Аммо ҳар қандай ҳолатда ҳам биз ўз позициямизни мустаҳкамлашда давом этамиз. Агар ҳозирги сиёсатчилар билан бўлмаса, унда Европада сиёсий элиталар алмашганда».

Путин шунингдек, АҚШ маъмурияти мулоқотга «тайёрликни намойиш этаётганини» билдирди. «Биз улар билан мулоқотдамиз. Умид қиламанки, худди шу нарса Европа билан ҳам бўлади».

Юқори мартабали ҳарбий зобитларига мурожаат қилар экан, Путин яна бир бор Россия ядро арсенали модернизацияси билан мақтанди.

«Ядро кучларимизнинг 92 фоизи модернизация қилинган. Дунёнинг бошқа ҳеч бир мамлакатида, ҳеч бир ядро давлатида бундай нарса йўқ. Биз янги қуроллар ва янги йўқ қилиш воситаларини ишлаб чиқяпмиз. Дунёда бошқа ҳеч кимда улар йўқ ва яқин вақт ичида пайдо ҳам бўлмайди», деган Путин.

Россия, етакчиси шунингдек, Россиянинг ядро каллаги ўрнатилиши мумкин бўлган, ўрта масофали янги «Орешник» баллистик ракетаси бу ойдан расман жанговар навбатчиликка киришини айтди.

Йиғилишда сўзга чиққан Россия Мудофаа вазири Андрей Белоусовга кўра, 2026 йилга мўлжалланган вазифалардан бири ҳужумлар суръатини оширишдир. Унинг нутқи давомида кўрсатган слайдда Россия 2025 йилда урушга ялпи ички маҳсулотининг 5,1 фоизини сарфлаётгани қайд этилган.

Сулҳ музокаралари

Путиннинг бу қатъий оҳангдаги баёнотлари – АҚШ расмийлари Украинага доир музокараларда қарийб 90 фоиз мураккаб масалалар ҳал қилинганини айтган бир пайтга тўғри келди. Бироқ Россия етакчиси ўзининг кенг қамровли талабларидан муросага тайёрми ёки йўқми деган саволлар ҳануз сақланиб қолмоқда.

АҚШ Россия билан ҳам, алоҳида равишда Киев ва Европа етакчилари билан Украина урушини тугатиш бўйича музокаралар ўтказмоқда.

Киев ва Европа Иттифоқи Украинадан ҳудудий ён беришлар талаб қилинаётганидан хавотирда. Украина эса АҚШдан кучли хавфсизлик кафолатларини хоҳламоқда.

Reutersʼнинг ёзишича, Россия ҳозирда Украинанинг қарийб 19 фоиз ҳудудини назорат қилаётганини айтиб келади. Бунга – аннексия қилинган Қрим, Донбасс минтақаси, Херсон ва Запорожия вилоятларининг катта ҳудуди ҳамда яна тўртта вилоятнинг айрим қисмлари киради.

Путин эса бир неча бор Киевдан шарқий Донбасс минтақасининг Украина назоратида қолаётган қисмларини ҳам топширишни талаб қилган. Оқ уй айрим пайтларда бу талабни қўллаб-қувватлаётгандек кўринган бўлса-да, Украина уни қатъиян рад этиб келмоқда.

Москва шунингдек, Украина армиясига қатъий чекловлар қўйишни, Украина ҳудудида Ғарб қўшинлари жойлаштирилишини тақиқлашни ва Ғарбнинг ҳарбий ёрдамини тўхтатишни талаб қилмоқда.

Европа етакчилари эса Киевни қўллаб-қувватлашларини ва Украинадаги уруш учун Россия мукофотланмаслиги кераклигини айтади.