Киевга Россия зарбаси оқибатлари – фотосуратлар

Беш қаватли турар жой биносидан деярли ҳеч нарса қолмаган. Камида 23 киши ҳалок бўлиб, ўнлаб кишилар яраланган, бир неча киши бедарак йўқолган деб ҳисобланмоқда.

РФ қуролли кучлари 28 августга ўтар кечаси Киевга ракеталар ва дронлар билан навбатдаги йирик ҳужумини уюштирди. Ракеталардан бири Дарницкий районидаги Борисполская кўчасида жойлашган беш қаватли турар жой биносига келиб тушган, у деярли бутунлай вайрон бўлган.

Украина расмийларининг сўнгги маълумотларига кўра, Киевда камида 23 киши ҳалок бўлган, уларнинг аксарияти Дарницкий районидаги кўп қаватли уйда яшовчилар бўлишган. Ўнлаб кишилар яраланган. Харобалар остида одамлар қолган бўлиши мумкин, ИИВ бир неча киши бедарак йўқолган деб ҳисоблаётганини хабар қилган.

Украина президенти Володимир Зеленский Россия «музокаралар столи ўрнига баллистикани, урушни тугатиш ўрнига қотилликларни давом эттиришни танлаётгани»ни айтди. Киевда 29 август Россия ҳужуми қурбонлари хотирасига мотам куни деб эълон қилинди. Қуйида РФ қуролли кучларининг Киевга зарбаси оқибатлари акс этган суратлар.