Алишер Усмонов Россия Молия вазирлигига 500 млрд рубль миқдоридаги инвестицияларни ваъда қилди

Алишер Усмоновнинг «Металлоинвест» компанияси ўн йил давомида қувватларни модернизация қилишга 507 млрд рубль сармоя киритишни режалаштирмоқда.

Владимир Потаниннинг «Норильский никель», Алишер Усмоновнинг «Металлоинвест» ва Саид Каримовнинг (сенатор Сулейман Каримовнинг ўғли) «Полюс» компанияси РФ бош вазири биринчи ўринбосари Антон Силуанов раҳбарлигидаги ишчи гуруҳи доирасида тайёрланган янги инвестиция лойиҳаларига 1,8 трлн рубль йўналтиришга тайёр, деб ёзмоқда РБК.

Бу 26 ноябрь, душанба куни, Молия вазирлигидаги йиғилиш якунлари бўйича хусусий иштирокчи-инвесторларнинг таклифлари рўйхатидан келиб чиқади.

Рўйхатга 21 йирик инвестордан 7,3 трлн рубллик 143 лойиҳа киритилган. «Норникель» ўз ҳисобидан 12та лойиҳани амалга оширишга тайёр, у 749,4 млрд рубль йўналтиради. «Металлоинвест» ўз сармоясини умумий қиймати 812,2 млрд рубль бўлган 17та инвестиция лойиҳасига 541,5 млрд рубль даражасида ажратади, «Полюс» эса еттита лойиҳага ўзининг 507 млрд рублини йўналтиради.

Россия Молия вазирлигидан хабар беришларича, йирик бизнес умумий қиймати 14,5 трлн рублдан ортиқ бўлган инвестиция лойиҳаларини амалга ошириш учун вазирликка мурожаат қилган. Тадбиркорлар бир хил бизнес юритиш шароитлари ва солиқлар қайтарилишига ваъда беришган.

Ушбу рўйхатда лойиҳаларнинг номи кўрсатилмаган, аммо, масалан, «Металлоинвест» ўн йил мобайнида 507 миллиард рублни қувватларни модернизация қилишга инвестиция сифатида киритишни режалаштирмоқда, дейди унинг бош директори Андрей Варичев.