Суд Россия банкининг Euroclear’га қарши даъвоси бўйича биринчи эшитувни ўтказди

Москва арбитраж судида жума куни, 16 январда Европада музлатилган, қиймати тахминан 200 млрд еврога тенг Россия активлари юзасидан даъво иши бўйича дастлабки биринчи эшитув бўлиб ўтди. Даъвони Россия Марказий банки Euroclear Белгия молиявий компаниясига қарши киритган. “Интерфакс” мухбири суд залидан хабар беришича, судя Анна Петрухина МБ илтимосига кўра банк сирини ҳимоя қилиш мақсадида эшитувни ёпиқ эшиклар ортида ўтказиш тўғрисида қарор чиқарган.

Унинг маълумотларига кўра, Euroclear судда ишни кўриб чиқишга тўсқинлик қилувчи илтимосномалар ва аризалар, аввало, кўриб чиқилиши кераклигини таъкидлаган. Депозитарий иккита шундай илтимосномани билдирган: ишни кўриб чиқмасдан қолдириш ва иш юритувини тугатиш ҳақида.

“Интерфакс” ёзишича, Euroclear вакили жараённи ёпиш ҳақидаги илтимоснома 2025 йил 25 декабр санаси билан расмийлаштирилганини, аммо жавобгар уни фақат жума кунги мажлис олдидан олганини айтган. Унинг сўзларига кўра, ҳужжатни ўрганиш учун вақт керак. Ўз навбатида, Россия МБ вакили жавобгар даъво аризасини — унда Россия банкининг мажлисни ёпиқ ўтказиш бўйича позицияси ҳам баён этилган — 2026 йил 7 январ куни олганини билдириб, Euroclear келтирган далилларни “ўйлаб топилган ва нопрофессионал” деб атаган.

Оқибатда суд жараённи тўлиқ ёпиқ ўтказишга қарор қилган. Бу қарор эълон қилингач, Euroclear вакили унга жараённи ёпиш масаласида ўз позициясини тақдим этиш имкони берилмаганини айтган. Судя эса жавобгарга ўз фикрини билдиришни таклиф этганини маълум қилган.

“Интерфакс”нинг ишга яқин манбасига кўра, Москва арбитраж суди 4 март куни РФ МБнинг Euroclear’га қарши даъвосини кўриб чиқишни давом эттиради.

Москва арбитраж суди чакана (жисмоний) инвесторларнинг РФ МБнинг Euroclear’га қарши даъво ишига қўшилиш ҳақидаги аризаларини қаноатлантиришни рад этган. Бу ҳақда судда бир неча инвесторларнинг вакили Владимир Сауриди журналистларга маълум қилди. Унинг сўзларига кўра, суд барча жисмоний шахсларнинг аризаларини рад этган.

Чакана инвесторлар даъвога қўшилишни истаган, чунки санкциялар сабаб Euroclear бошқарадиган қимматли қоғозларини тасарруф этиш имкониятидан маҳрум бўлган. Арбитраж ишлари картотекасида 17 кишининг исмлари кўрсатилган эди.

Euroclear’га қарши Россиядаги суд даъвоси қандай таъсир кўрсатиши ҳали ноаниқ. AFP журналисти хабар беришича, судда иштирок этган компания юристлари ишни изоҳлашдан бош тортган.

AFP таъкидлашича, МБ даъвони ўтган йил декабрида — ЕИ давлатлари музлатилган Россия активларидан Украинага “репарацион кредит” учун фойдаланиш масаласини муҳокама қилаётган пайтда киритган. Бироқ кейинчалик улар бу ғоядан воз кечган ва 19 декабр куни бўлиб ўтган ЕИ саммитида Украинага ЕИ бюджети имкониятларидан фойдаланган ҳолда 90 млрд евро миқдорида кредит ажратиш бўйича келишиб олган.

ЕИ Россиянинг Украинага қарши кенг кўламли ҳужуми учун жорий этилган санкциялар доирасида Россия активларини 2022 йил баҳорида музлатган. Euroclear ЕИдаги Россия активларининг катта қисмини бошқаради.