Германияда Audi автоконцерни раҳбари қўлга олинди

Германияда Audi бошқаруви раиси Руперт Штадлер вақтинчалик қўлга олинди. Бу ҳақда Sueddeutsche Zeitung ёзмоқда.

Таъкидланишича, унинг қўлга олиниши «дизель можароси» билан боғлиқдир. Ўтган ҳафта унинг уйида тинтувлар ўтказилгани айтиляпти. Бундан ташқари, Мюнхен прокуратураси унга қарши иш қўзғатган, у «фирибгарлик ва ҳужжатларни қалбакилаштиришда» гумонланмоқда.

Audi вакилининг сўзларига кўра, бошқарув раиси 18 июнь куни эрталаб қўлга олинган.

«Ҳозирги вақтда ҳибсга олиш қанчалик қонуний иш бўлганини текшириш давом этмоқда», - дея айтиб ўтди манба.

2017 йилда Volkswagen AG компанияси ижрочи директори Оливер Шмидт «дизель можароси» бўйича ўзини айбдор деб тан олганди. У АҚШнинг Детройт округ судидаги йиғилишда концерн дизель автомобилларининг зарари ҳақидаги маълумотларни қалбакилаштириш бўйича айбдорлигини тан олганди.

Автоконцерн атрофидаги «дизельгейт» можароси 2015 йилда бошланганди. Ҳукумат компанияни ишланган газларда зарарли моддалар мавжудлиги ҳақидаги ҳақиқий маълумотларни яшириш имконини берувчи дастурни ишлаб чиқишда ва автомобилларни шундай дастур билан жиҳозлашда айблаган.

Ўтган ҳафтада Мюнхен прокуратураси Европадаги истеъмолчиларга чиқинди газлардаги зарарли моддалар ҳақидаги маълумотлари ўзгартирилган автомобиллар сотишга алоқадорликда гумон қилиб, Руперт Штадлерга нисбатан тергов бошлаганди.

Аввалроқ, Брауншвейг прокурори Volkswagen концернини 1 млрд евролик жаримага тортганди. Бунга дизель ёқилғисидаги автомобиллар синовини ўтказиш қоидаларига амал қилмаслик сабаб бўлган.