Байден шу ҳафтада президентлик пойгасидан чиқиши мумкин — ОАВ

Бир қанча юқори мартабали демократлар ўзаро суҳбатларда партия етакчилари ва яқин дўстлари томонидан кучайиб бораётган босим АҚШ президенти Жо Байденни шу ҳафтанинг дам олиш кунлари президентлик пойгасидан чиқишга ундаши мумкинлигини айтмоқда. Бу ҳақда Axios ёзди.

Таъкидланишича, ҳозир ковид туфайли ўзини яккалаб қўйган 81 ёшли президент иш билан банд. Аммо ўзаро суҳбатларда у босимнинг кучайиши, сўровлардаги салбий натижалар ва адолатсиз текширувларга тан берганини айтган, бу эса унинг сайловолди кампаниясини давом эттиришига имкон бермаяпти, деди демократлардан бири нашрга.

Уларнинг айтишича, партиянинг юқори мартабали етакчилари, дўстлари ва асосий донорлари Байден ғалаба қозона олмайди, ёши ва ақлий қобилияти ҳақидаги жамоатчилик фикрини ўзгартира олмайди ва Конгрессда кўпчиликни қўлга кирита олмайди, деб ҳисоблайди.

«Президентга айтилмоқдаки, агар у ўз лавозимида қолса, Трамп катта устунлик билан ғалаба қозониб, Байден мероси ва демократларнинг умидларини йўқ қилиши мумкин. Ўз номзодини қайтариб олиш учун Байденга нисбатан босим, айниқса, сўнгги бир неча кун ичида чидаб бўлмас даражада ошиб бормоқда… Босим тўхтамаяпти», дейилади мақолада.

Демократлар Республикачиларнинг миллий қурултойидан кейин ўтказилган сўровлар катта мағлубиятни кўрсатиб бериши, амалда Демократик партиянинг Конгрессдаги мағлубиятига олиб келиши мумкинлигидан хавотирда.

«Унинг танлови - тарих қаҳрамонларидан бирига айланиш ёки Байденнинг президентлик кутубхонаси ҳеч қачон бўлмаслигига ишонч ҳосил қилиш. У тўғри йўл тутади деб дуо қиламан. У шу йўналишда кетмоқда», деган президентнинг яқин дўстларидан бири.

Демократларнинг Сенатдаги етакчиси Чак Шумер Трампга суиқасд уюштирилган куни Байденга сайловда қатнашишдан бош тортса яхшироқ бўлишини айтган.

Вакиллар палатаси собиқ спикери Нэнси Пелоси президент Жо Байденга шахсан қўнғироқ қилган. Суҳбат давомида у сўровлар президент Доналд Трампни мағлуб эта олмаслигини кўрсатаётганини айтган.

Шу билан бирга, Жо Байден аввалроқ сайловларда иштирок этишдан бош тортиши мумкинлигини айтган эди. Агар соғлиғида жиддий муаммолар юзага келса, Байден бу қарорни қабул қилишга тайёр.