Украина асирлигидан 20 нафар чечен қайтарилди. Улар жангсиз таслим бўлишганини айтишганди

Чеченистон раҳбари Рамзан Қодиров 5 феврал куни Россия ва Украина ўртасида ўтказилган ҳарбий асирлар алмашинуви чоғида 20 нафар чеченистонлик ватанига қайтганини маълум қилди.

Қодиров ўз телеграм-каналида ёзишича, унинг жамоаси анчадан бери чеченларни қайтариш масаласи билан шуғулланиб келган. Чеченистон раҳбари бу масалада БАА президенти Шайх Муҳаммад ибн Зайд Ол Наҳаён билан гаплашганини айтди. Қодиров у билан январ ойида, БАА президенти Владимир Путин билан музокаралар ўтказиш учун Москвага келганида учрашганди.

«Умуман олганда, асирга олинган ҳарбий хизматчиларни қайтариш бўйича тадбирлар биз томонимиздан доимий ва тизимли равишда олиб борилмоқда», – деди Қодиров. У ўз жамоаси «бундан кейин ҳам россиялик ҳарбий хизматчиларнинг уйга қайтишига ёрдам бериш учун қўлидан келган барча ишни қилиши»ни қўшимча қилган.

«Агентство» маълумотига кўра, Украина асирлигидан қайтарилганлар «Ахмат-Чеченистон» полкининг 2024 йил августида Курск области ҳудудида қўлга олинган ҳарбий хизматчиларидир. Асирлик чоғида берган интервюларида улар офицерлар ташлаб кетишгани ҳамда жангсиз таслим бўлишганини айтишганди. Масалан, 36 ёшли ҳарбий хизматчи Заур Чааров Украина қуролли кучларининг Курск областидаги ҳужуми бошланганидан кейин «комбат ва унинг ўринбосари, штаб бошлиғи ўринбосари – тўрт-беш киши дарҳол ўрмонга қочиб кетгани» ҳақида сўзлаб берган.

Ахматчилардан яна бири Магомед Зарахматов 14 август куни Свердликово қишлоғида асирга тушганини айтган: «Бизга яқинлашишди, ўраб олишди. Ихтиёрий равишда таслим бўлдик, қаршилик кўрсатмадик. [Қаршилик кўрсатиш] нега керак?»

«Первая полоса» нашри қайд этишича, ўтган йилларда Қодиров асирга тушувчи чеченларни танқид қилганди. Хусусан, 2023 йил февралида у «Грозний-информ» нашрига «чеченлар асир тушмаслиги»ни айтганди. Ўша йил апрелида эса асирликдан қайтиб келган беш нафар чечен билан учрашишдан бош тортганди. «Мен чечен жангчисида асир тушиш учун ҳеч қандай сабаб бўлмаслиги керак, деб ҳисоблайман», – деганди ўшанда республика раҳбари.

«Ахмат» командири Апти Алаудинов ҳам 2024 йил сентябрида «ўз ихтиёри билан таслим бўлган» чеченларни асирликдан қутқаришга ҳаракат қилмаслигини маълум қилганди. Аммо, «Агентство» нашри қайд этишича, 2024 йил охирида чеченистонлик Акрамон Асхабов асирликдан қайтиб келганди. У асирга олинганида устида Stefano Ricci брендининг икки минг доллардан ортиқ нархдаги кийими бўлган.