Грецияда поездлар тўқнашуви оқибатида ўнлаб кишилар ҳалок бўлди

Грецияда йўловчи ва юк поездининг тўқнашуви натижасида камида 32 киши ҳалок бўлди, 85 киши жароҳат олди.

Фото: AP

Грецияда 1 март, чоршанбага ўтар кечаси икки поезднинг тўқнашуви оқибатида камида 32 киши ҳалок бўлди, яна 85 киши жароҳатланди, деб хабар бермоқда Reuters агентлиги мамлакат қутқарув хизматларига таяниб.

Афинадан 370 км узоқликда жойлашган Лариса шаҳри яқинида ичида 350 киши бўлган йўловчи ва юк поездлари тўқнашиб кетди. Натижада вагонлар релсдан чиқиб кетган, улардан бирида ёнғин чиққан.

Ҳодисадан жабрланмаган йўловчилар эвакуация қилинган ва автобусда Салоники шаҳрига жўнатилган.

Икки поезднинг бир йўлда тўқнаш келгани сабаблари ҳали аниқлаштирилмади.

Қутқарув ишлари давом этмоқда. Минтақа губернатори Костас Агорастос жароҳатланганлар ва қурбонлар сони ортиши мумкинлигини айтди. Унга кўра, йўловчи поездининг тўртта вагони рельсдан чиқиб кетган, биринчи иккитаси эса «деярли бутунлай вайрон бўлган».

Темирйўл оператори Hellenic Train «икки поезд – Афинадан Салоникига кетаётган юк поезди ва IC 62 поезди ўртасида тўқнашув содир бўлганини» айтди. «Тўқнашув вақтида бортда 350 га яқин йўловчи бўлган. Воқеа жойига ўт ўчирувчилар ва Hellenic Train ходимлари етиб келган, қутқарув ишларида қатнашган ва саёҳатчиларга ёрдам беришган», - дейилади компания хабарида.