Москвада Россия армиясининг нуфузли генерали портлатиб юборилди

17 декабр куни Москва шаҳрининг Нижгород районидаги уй ҳовлиси олдида содир бўлган портлашда икки киши ҳалок бўлди. Портлаш тўлқини атрофдаги квартираларнинг деразаларини учириб юборган.

РФ тергов қўмитаси портлаш оқибатида Россия қуролли кучларининг радиация, кимёвий ва биологик мудофаа қўшинлари бошлиғи, генерал-лейтенант Игор Кириллов ҳамда унинг ёрдамчиси Иля П. ҳалок бўлганини тасдиқлади.

Ҳолат юзасидан жиноий иш очилган. Москва прокуратураси ишни назоратига олган.

«Воқеа жойида терговчилар, суд-тиббиёт экспертлари ва фавқулодда хизматлар ишламоқда. Ҳозирда содир этилган жиноятнинг барча ҳолатларини аниқлашга қаратилган тергов ҳаракатлари ва тезкор-қидирув тадбирлари олиб борилмоқда» – дейилади қўмита хабарида.

Гувоҳларнинг сўзларига кўра, портлаш Кирилловга хизмат машинаси келгач, ҳарбийлар уйдан чиқаётганда содир бўлган. Катта эҳтимол билан, портловчи қурилма уй яқинида тўхтаб турган скутерга ўрнатилган бўлган.

У катта эҳтимол билан радиосигнал ёки мобил телефон қўнғироғи орқали фаоллаштирилган.

Портловчи қурилма 300 грамм тротил қувватига эга бўлган, натижада уйнинг кириш эшиги ва деразалари синиб кетган, генералнинг хизмат машинаси ҳам шикастланган.

«Коммерсант» газетаси ёзишича, тергов портлаш украин махсус хизматлари — Украина мудофаа вазирлиги разведка бош бошқармаси ёки Украина хавфсизлик хизматлари томонидан уюштирилганини гумон қилмоқда, бу идоралар таниқли шахс экани туфайли Кирилловни нишон сифатида танлаган бўлиши мумкин.

Бир кун олдин Украина нашрлари россиялик ушбу генерал урушда кимёвий қуролларни қўллаш ҳақида шахсан топшириқ бергани ва бунинг ортидан ҳарбий жиноятларда гумонланаётганини ёзганди.

54 ёшли Кириллов 2017 йил апрелида Россия қуролли кучларининг радиация, кимёвий ва биологик мудофаа қўшинлари бошлиғи бўлганди. Тимошенко номидаги Радиация, кимёвий ва биологик ҳимоя ҳарбий академиясини тамомлаган. 2017 йилга қадар ушбу академияга раҳбарлик қилган.

Бугун Кириллов РФ мудофаа вазирлиги брифингида иштирок этиши режалаштирилганди. У мунтазам равишда шундай брифинглар ўтказиб келади ва АҚШнинг Украинадаги «ҳарбий-биологик фаолияти» ҳақида сўзлаб беради. Хусусан, 2022 йилда АҚШни Украинада чивинлар орқали тарқатиладиган вируслар тадқиқ этиладиган биолабораториялар яратишда айблаган. 2023 йилда эса АҚШ рақиб ҳарбий хизматчиларини заҳарлаш учун бундай чивинларни дронлар орқали етказишни режалаштираётгани ҳақида гапирганди. У шунингдек, Россияда парранда гриппи билан касалланиш даражаси ортганини Украинадан зарарланган қушлар миграцияси билан изоҳлаган.

Бундан ташқари, Кириллов Украинани «ифлос бомба» яратиш ниятида бўлганини айтган ва бунинг учун гўёки Европадан мамлакатга утилизация қилиш учун олиб келинган ишлатилган ядро ёқилғисидан фойдаланиш мумкинлигига, бу ишни Украина президенти офиси раҳбари Андрей Ермак шахсан ўз назоратига олганига ишонтирган.

Украини президенти офиси раҳбари маслаҳатчиси Михайло Подоляк журналист Александр Плюшчевнинг Кирилловга эълон қилинган гумонлар унинг ўлдирилиши билан қанчалик боғлиқлиги ҳақидаги саволига инкор маъносида жавоб қайтарган. Унинг сўзларига кўра, Украина эътиборини «юридик йўналиш бўйича ишлашга қаратган»: жиноят таркибини қайд этиш, жиноий иш очиш ва якунда жазога тортишга эришиш. У шунингдек, Украина «террорчилик формати методлари»дан фойдаланмаслигини таъкидлаган. «У ёки бу генерал бўйича қарор бизда бошқа жойда эмас, жанг майдонида қабул қилинади», — дея қўшимча қилган Подоляк. Унинг ҳисоблашича, Кирилловнинг қотиллиги «ичкарида тўпланиб қолган зиддиятлар» туфайли рўй берган.

Кирилловга нисбатан Украина ва Буюк Британия томонидан санкциялар қўлланган. АҚШ генералга қарши санкция жорий этмаганди.

Россия ТИВ расмий вакили Мария Захарованинг айтишича, Кириллов кўп йиллар мобайнида «англосаксларнинг жиноятларини тизимли равишда фош этган: наточиларнинг Сурияда кимёвий қуроллар билан провокацияси, Британиянинг тақиқланган кимёвий моддалар билан манипуляция қилиши ҳамда Солсбери ва Эймсберидаги провокациялар», шунингдек, америкаликларнинг Украинадаги «биолабораториясининг ажалвор фаолиятини». «Қўрқмасдан ишлаган. Бировнинг ортига бекинмаган. Кўкрагини кериб юрган. Ватан учун, ҳақиқат учун», — дея ёзган Захарова. 

Маълумот учун, генерал-лейтенант — Россия армиясидаги энг юқори офицерлик унвонларидан бири саналади. Сешанба кунги портлашга қадар фронт ортида ҳалок бўлган энг юқори мартабали россиялик ҳарбий Қора денгиз флоти 41-ракета катерлари бригадаси қўмондони, биринчи рангли капитан (катта офицер) Валерий Транковский бўлганди. Севастополда унинг машинаси портлатиб юборилган.