Ҳалабда 4 соат ичида жангариларнинг 150дан ортиқ ракетаси портлаган

Террорчилар Ҳалаб шаҳрининг аҳоли мавзелари ва шаҳар марказига ўт очишни кучайтирган. Хабарларга кўра, ўтган 4 соат мобайнида шаҳарда 150 дан ортиқ ракета ва снаряд портлаган, деб хабар қилмоқда РИА Новости агентлиги кўнгиллилар вакилига таянган ҳолда. 

Ҳалаб шаҳри шифохонаси ходимининг сўзларига кўра, тиббиёт муассасасига Азизия тумани ва шаҳар ҳокимлиги ҳудудидан жабрланганлар келтирилган. Ҳозирча, қурбонлар ва жароҳат олганлар сонига ойдинлик киритилмаган. Улар орасида болалар ҳам кўпчиликни ташкил этаётгани айтилмоқда. 

Қайд этиш жоизки, Сурия бўйлаб 12 июнга қадар эълон қилинган ўт очишни тўхтатиш тартибига қарамай, жангарилар 8 июлдан, Ҳалабнинг марказий кўчалари ва аҳоли тураржойларини ўққа тута бошлаган. Сўнгги маълумотларга кўра,  икки сутка ичида 44 киши қурбон бўлиб, 300дан ортиқ одам оғир яраланган. 

Ҳалабдаги жанговар ҳаракатларнинг бошланишига қамалда қолган жангариларнинг бирлашган ҳолда қуршовдан чиқишга уринишлари сабаб бўлган.