ОАВ: Туркия флотининг 14 та кемаси ғойиб бўлди

Туркия ҳарбий денгиз флотининг 14 та ҳарбий кемаси, давлат тўнтаришига муваффақиятсиз уринишдан сўнг, бедарак ғойиб бўлди, деб ёзмоқда The Times газетаси ўз манбаларига таянган ҳолда. 

Хабар қилинишича, ўтган ҳафта дам олиш кунлари юз берган воқеалардан аввал, кемалар Эгей ва Қора денгизда ҳарбий навбатда турган. Уларнинг ғойиб бўлиши, кемалар грек портларига кетиши мумкин, деган фикрни пайдо қилмоқда. Чунки, 16-июль кунги давлат тўнтаришининг барбод бўлишидан сўнг, 8 нафар турк ҳарбийси вертолётда Грецияга учиб келиб, сиёсий бошпана сўраган эди. 

Бундан ташқари, флот қўмондони Вейсел Кезеле ҳам 16-июль кунидан бери алоқага чиқмаган. Бироқ, ҳозирча унинг исёндаги ўрни номаълумлигича қолмоқда. У гаровга олинган ёки ҳарбий давлат тўнтариши ташкилотчиларидан бири бўлгани эҳтимол. Туркия ОАВлари таъкидлашича, Кезелени тўнтариш тарафдорлари алдов билан кемага олиб ўтишган.