Украина ХВЖдан 1 млрд доллар олди

Украина Халқаро валюта жамғармасидан (ХВЖ) 1 млрд доллар олди, деб хабар бермоқда УНИАН ахборот агентлиги.  

"Украина миллий банки маълумотига кўра, 14 сентябрда кечки вақт маълум қилинган, жамғарма директорлари кенгаши қарори доирасида кутилганидек 1 млрд доллар миқдорида маблағ олинди", деб маълум қилди агентлик. 

ХВЖ Украинанинг Россияга қарзи бўлишига қарамасдан унга ёрдам кўрсатмоқда. Жамғарма қоидаларига кўра, қарздор давлат ўз қарзини тўлаш бўйича виждонли саъй-ҳаракатларни намойиш қилган тақдирдагина бунга йўл қўйилади.

Аввалроқ Россия молия вазири Антон Силуанов Киев қарзини тўлаш бўйича ҳеч қандай саъй-ҳаракатни амалга оширмаётгани ва Москва ХВЖнинг Украинага навбатдаги кредитни бериш бўйича ёндашувидан жуда ҳафсаласи пир бўлганини айтганди.