Тайланд қиролининг соғлиғи ёмонлашди

Фото: ibtimes

9 октябрь куни Тайланднинг 88 ёшли қироли Пхумипон Адульядетнинг соғлиғи барқарорлашмаган. Шу сабабли, меросхўр шаҳзода Маха Вачиралонгкорн ва Тайланд бош вазири Прают Чан-оча зудлик билан мамлакат пойтахтига қайтишган. Қирол даволанаётган шифохона олдига ўнлаб фуқаролар тўпланиб, унинг соғлиғи ҳақида қайғуришмоқда.

Қирол Пхумипон Бангкокнинг Сирирач шифохонасида даволанмоқда. У сўнгги бир йил мобайнида мазкур муассасани деярли тарк этмади.

Тайланд ҳукумати қирол соғлиғи ёмонлашгани ҳақида 1 октябрда хабар қилган эди. 9 октябрга келиб бу борада ижобий ўзгариш кузатилмаган. Сўнгги маълумотларга кўра, шифокорлар қирол қонида инфекция борлигини ва жигари ғалати фаолият кўрсатаётганини айтишган.

Тайёрлаган: Толиб Раҳматов

#Тайланд #Бангкок #қирол