«Ливерпуль» тўртинчи дивизион жамоасини енга олмади

«Ливерпуль» Иккинчи лига (Англия чемпионатида тўртинчи дивизион) вакили «Плимут Аргайл» билан Англия Кубогининг 1/32 финали доирасида куч синашди. Ливерпулдаги «Энфилд» стадионида кечган учрашувда ҳисоб очилмади - 0:0.

Биринчи бўлимда мезбонлар ҳудудий устунликка эга бўлишди. «Ливерпуль» кўп вақтни ҳужумда ўтказди, лекин голга тортадиган вазиятлар кўп бўлмади. Танаффусдан кейин ҳам умумий картина ўзгармади: «Плимут» чуқур ҳимояланди ва дурангга эришди.

Энди бу жамоалар кейинги босқичга чиқиш учун қайтадан ўйин ўтказишади.

Ливерпуль – Плимут 0:0
Ливерпуль – Кариус, Александер-Арнолд, Гомес, Морено, Эджариа (Лаллана, 75), Стюарт, Жан (Старридж, 63), Лейва, Оджо, Вудберн (Фирмино, 75), Ориги.
Плимут – Маккормик, Брэдли, Сонго’О, Перрингтон, Трелкелд, Кэри, Фокс, Миллер (Смит, 76), Гарита (Тэннер, 65), Жервис, Слю.