Siemens AG концернининг Даниядаги бўлими, шамол электр станциялари ишлаб чиқариш билан шуғулланувчи Siemens Wind Power A/S шамол турбиналари ва уларнинг қисмларини ташиш учун янги транспорт кемаси олди. Бу кема жуда ҳайратланарли ўлчамларга эга!
Икки йил аввал Siemens Wind Power юкларни ташишда горизонтал ҳолатда юклаш ва тушириш тизимига эга янги транспорт юк кемаларини сотиб олишга қарор қилганди. Бундай кема яқинда иш жараёнида намойиш қилинди.
Кема Rotra Vente деб аталиб, унинг узунлиги 141 метрни ташкил қилади ва бир ташишда 8 МВт қувватга эга бир нечта шамол турбиналарининг улкан гондолаларини ташишга қодир. Бу турбиналардан ҳар бири жуда катта ўлчамларга эга. Мисол учун, Siemens Wind Power шамол генераторининг SWT–7.0–154 модели йиғилган ҳолатда 200 метр баландликка эга. Генераторнинг ўзи 220 тонна келади. Қисқача айтганда, кемада жуда катта ва оғир конструкцияларни ташишга тўғри келади.
Кемани Deugro Denmark компанияси қурган. Компания кемани ясашда контейнер ташувчи кемани асос қилиб олган.
Айни вақтда яна битта шундай кемани яратиш устида ишлар жадал кетмоқда. Бу кема шамол турбиналарининг миноралари ва парракларини ташиш учун мўлжалланган. Янги кема бир вақтнинг ўзида узунлиги 80 метрга етадиган 12 тагача парракни ўзида сиғдира олади.
