Ford компанияси баъзи моделларини бозорга қайтармоқчи

Ford компанияси Bronco моделини қайта яратиш режасини расман тасдиқлади. Йўлтанламаснинг янги авлоди АҚШлик дилерларда 2020 йилда пайдо бўлади. Бу ҳақда Детройтдаги матбуот-анжуманда компания раҳбари Марк Филдс маълум қилди. 

Асл Ford Bronco модели 1966 йилда тақдим қилинган. Модель 1996 йилгача ишлаб чиқарилган. Сўнгра унинг ўрнига катта ўлчамли Expedition йўлтанламаси келган ва у ҳанузгача сотилади.

Компания "Бронко"дан ташқари бозорга Ranger пикапини қайтармоқчи. У сал олдинроқ, яъни 2019 йилда пайдо бўлади.

Аввалроқ Ford янги ривожланиш стратегиясини эълон қилганди, унинг доирасида яқин 5 йил ичида электр ва гибрид куч қурилмаларига эга 13 та автомобиль чиқарилади. Бу машиналар қаторидан Mustang спорткари ва F-150 пикап ўрин олади. Компания бу режани амалга ошириш учун умумий ҳисобда 4,5 млрд доллар сарфлайди.