Экспертиза Идлибда кимёвий қурол қўлланганини тасдиқлади

Суриянинг Идлиб шаҳридан Туркиянинг Адана шаҳрига 3 нафар сурияликнинг жасади олиб келинди ва патологоанатомик экспертиза ўтказилди. Туркия Адлия вазири Бекир Бўздоғнинг маълум қилишича, экспертиза хулосалари ушбу сурияликлар кимёвий қуролдан ҳалок бўлганини тасдиқлаган. 

«Айни вақтда Бутундунё соғлиқни сақлаш ташкилоти ва Кимёвий қуролларни тақиқлаш бўйича ташкилот вакиллари иштирокида ўтказилган экспертиза якунланди. Экспертиза якунлари Асад режими томонидан кимёвий қурол қўлланганини кўрсатди», - деган вазир.

Сурия ҳукумати самолётлари томонидан 4 апрель куни Идлиб вилоятидаги Хан Шайхун пунктига заҳарли газ тўлдирилган бомбалар ташланиши оқибатида тинч аҳоли вакилларидан 100 киши, жумладан, ўнлаб болалар ҳалок бўлиб, 500 киши (аксар қисми болалар) шифохонага ётқизилганди.