Samsung Galaxy Note 8 икки камерага эга бўлади (5 сурат)

Samsung компанияси янги флагманларининг техник хусусиятлари муҳокама босқичида интернетда Galaxy S8 ва  Galaxy S8 Plus қурилмалари икки камера билан таъминланишига оид тахминлар илгари сурилган эди. Тўнғич моделнинг суратлари тармоқда тарқалгандан кейин бу тахминлар билвосита тасдиқланди. Phonearena шу ҳақидаги маълумоти билан бўлишди. 

Суратлар ишлаб чиқарувчиларнинг икки вертикал камерали смартфон тақдим этишни режалаштирганидан далолат беради. Интернетда мазкур флагман прототипининг янги тасвирлари тарқалишда давом этмоқда. Яқинда смартфоннинг олд ва орқа қисми сурати пайдо бўлди. Унда қурилманинг икки камера ва бармоқ излари сканери билан таъминланганини кўриш мумкин. 

Баъзи фойдаланувчиларнинг тахминларига кўра, суратларда тақдимоти режалаштирилаётган Galaxy Note 8 фаблети акс эттирилган бўлиши мумкин. 

Гаджетлар борасида аксарият тахминлари тўғри чиқиши билан танилган KGI Securities таҳлилчиси Мин-Чи Куо Жанубий Корея гигантининг ҳақиқатда Note линейкасидан воз кечмаслигини тасдиқлади. 

Шунингдек Galaxy Note 8 флагмани 6.4-дюйм QHD+ қарорли Super AMOLED-дисплейи, Snapdragon 835 ёки Exynos 8895 топ процессори, 6 Гб оператив ва 256 Гб flesh-хотира билан таъминланиши маълум қилинган. Унинг ташқи кўриниши Galaxy S8'га ўхшаш бўлади.